Президенттің Жапонияға сапары барысында құны 3,7 млрд доллардан асатын келісімдерге қол қойылады

Мемлекет басшысының Жапонияға ресми сапары аясында қол қойылатын коммерциялық келісімдердің жалпы құны 3,7 миллиард доллардан асады.

Бұл туралы Қазақстан Республикасы Президентінің көмекшісі – Президенттің Баспасөз хатшысы Руслан Желдібай өзінің телеграмдағы парақшасында хабарлады. “Президент осы мақсатта Токиода жапониялық ірі бизнес өкілдерімен кездесулер өткізбек. Барлығы 40-тан астам құжатқа қол қою жоспарланған. Келісімдер энергетика, жаңартылатын қуат көздері, цифрландыру, тау-кен, көлік секілді негізгі салаларды қамтиды” делінген жазбада. Қос ел тарапынан құжаттарға ірі компаниялар өкілдері қол қояды. Сондай-ақ сапар аясында өзге де ресми келіссөздер мен іскерлік кездесулер өткізу жоспарланып отыр.