ҚТЖ ның еншілес компаниясы жүздеген миллион теңгеге премиум автокөліктерді сатылымға шығарды

"Қазақстан темір жолының" еншілес компаниясы KTZ Express бірнеше премиум санаттағы автокөлікті саудаға шығарды. Олардың бірі 164 миллион теңгеге бағаланған. Бұл көліктер компанияға қалай келді және неге оларды сату шешімі қабылданды – Tengrinews.kz тілшісінің материалынан оқыңыз.

164 миллион теңгелік Lexus: неге бағасы таңғалдырды?

Электрондық сауда порталында ҚТЖ-ның еншілес компаниясы KTZ Express үш автокөлікті сатылымға шығарды.

Оның екеуі Lexus премиум жол талғамайтын көліктері.

Бұл тізімдегі ең қымбаты 2019 жылғы ақ түсті Lexus LX570. Оны 164 817 000 теңгеге сатпақшы.

Фото sauda.e-qazyna.kz сайтынан

Айта кетейік, бұл нарықтағы ұқсас көліктерден 114 миллион теңгеге қымбат.

Мысалы, қайталама нарықта дәл осындай пайдаланылған автокөлік 50 900 000 теңгеге бағаланған.

Хабарландыру kolesa.kz сайтынан алынды

Ал тәуелсіз бағалаушылар саудаға түсетін көлік құнын 50 миллион теңге деп белгіледі.

Автокөлікті бағалау деректері

Алайда автокөлікке арналған аукцион бағаны түсіру әдісімен жарияланған. Бұл лот құны біртіндеп төмендейтін сауда түрі. Тауарды ұсынылған бағаға сатып алуға бірінші болып келіскен қатысушы жеңімпаз атанады.

Ондаған миллион теңге айырмашылық: саудадағы екінші Lexus

Тізімдегі екінші көлік те – Lexus LX570, бірақ ол 2014 жылғы. Ол алдыңғы модельден айтарлықтай арзан: бағасы 88 350 000 теңге.

Фото sauda.e-qazyna.kz сайтынан

Бірақ тәуелсіз сарапшылардың бағалауына сүйенсек, көлікті нарықтағы бағадан үш есе қымбатқа сатпақшы. Олардың дерегінше, бұл Lexus-тың бағасы 28 миллион теңге.

Автокөлікті бағалау деректері

Расында, бұл үлгідегі және параметрдегі көліктер қайталама нарықта осы баға аралығында сатылады.

Хабарландыру kolesa.kz сайтынан алынды

Бағасы ерекше Skoda

Үшінші лоттағы көлік премиум санатқа жатпайды – 2010 жылғы Skoda Super B6. Ол саудаға 17 100 000 теңгеге шығарылды. Бұл ретте оның нарықтағы бағасы (және ресми бағалаудағы құны) 5 есеге жуық арзан: небәрі 3,5 миллион теңге.

Фото sauda.e-qazyna.kz сайтынан

KTZ Express-ке бұл көліктер қайдан келді және неге сатылып жатыр?

Tengrinews.kz редакциясы осы сұрақпен ҚТЖ-ға жүгінді. Компания көліктерді өз қажеттіліктері үшін сатып алмағанын хабарлады.

Жауаптан көліктік-экспедиторлық қызмет көрсету шартын орындау кезінде мердігер талаптарды бұзғаны белгілі болды. Материалдар құқық қорғау органдарына беріліп, кейін қылмыстық іс қозғалған.

"Сот талқылауының қорытындысы бойынша жеткізуші "KTZ Express" АҚ-ға келтірілген шығынды өтеуге міндеттелді. Сот шешіміне сәйкес, жеткізушінің мүлкі (соның ішінде автокөліктер, пәтерлер және басқа да мүлік) келтірілген залалды өтеу есебіне берілді", – деп түсіндірді ҚТЖ.

Бұл мүлік 29 шілдеде басталған электрондық сауда арқылы сатылып жатыр.

KTZ Express немен айналысады?

"KTZ Express" АҚ - Қазақстанның ұлттық логистикалық операторы. Компания "Қазақстан темір жолы" АҚ-ның 100 пайыздық еншілес ұйымы. ҚТЖ теміржол инфрақұрылымы мен магистральдық жолдарды басқарса, KTZ Express коммерциялық логистикаға, контейнерлеуге, транзитке және мультимодальді бағыттарға жауап береді.

Бұған дейін Tengrinews.kz ҚТЖ-ның еншілес компаниясы "ҚТЖ – Жүк тасымалы" мекемесіне монополияға қарсы заңнаманы бұзғаны үшін 1,42 миллиард теңге айыппұл салынғаны туралы жазған болатын.

Бәсекелестікті қорғау және дамыту агенттігінің мәліметінше, компания тасымалдау жоспарын бөлу кезінде үлестес құрылымдары – KTZ Express пен "КедентрансСервис"-ке басымдық берген. Бұған Қазақстан, Қырғызстан экспедиторлар қауымдастығы және көліктік-экспедиторлық компаниялар шағымданған.

Google News арқылы жаңалықтарымызды қадағалаңыз

Жазылу