Құлсарыдағы Мереке павильоны: 40 млн теңгелік жоба әкімдікпен арадағы дауға айналды

Кәсіпкер Бекет Құлбаев өз қаражатына салған аялдама павильонын әкімдік жер келісімшартын ұзартпай, бұзылуы мүмкін екенін айтады. Ол мұны қаладағы жолдардың жағдайы мен тазалық мәселесін ашық сынағанымен байланыстырады.

Қаланың орталығы Махамбет даңғылында бұдан бес жыл бұрын аялдама болмаған. Белгі бар да тұрғындар ашық-шашық жерде автобусты сағаттап сарыла күтетін. 

Жауынды-шашынды күндері ықтасын жер таппай азап шеккен тұрғындарға жаны ашыған жеке кәсіпкер замануи үлгідегі автобус аялдамасын салуды көздейді. Бұл ұсынысын сол кездегі аудан әкімі Ж. Халеловке жеткізіп, өз жобасын ұсынады. Аялдама үш бөліктен тұратын болды: күту бөлмесі, кофехана және әжетхана.        

Қолдау бірден көрсетілмеген. Жоба бір жылдан астам уақыт шешімсіз қалған. Кәсіпкердің айтуынша, сол кезде қала әкімінің орынбасары болған Қадыржан Адинов (қазір Құлсары қаласының әкімі) жерді уақытша өтеусіз пайдалануға беруге қарсы болған.

Кейінірек, Жұмабек Қаражанов аудан әкімі болып тағайындалған соң, кәсіпкер жобасын қайта ұсынып, қолдау тапқан.

Құлбаевқа көлемі 0,0130 гектар жер учаскесі үш жыл мерзімге уақытша өтеусіз пайдалануға берілген. Оның айтуынша, құрылыс шамамен бір жылға созылып, 40 миллион теңгеге түскен. Бұл қаржыны ол мүлікті кепілге қойып, несие ретінде алған. Кәсіпкер бүгінге дейін сол несиені өтеп келе жатқанын айтады.

«Мереке» аялдама павильоны 2023 жылдың 27 қазанында аудан әкімінің орынбасары Гүлнафис Айшуақованың қатысуымен ашылды. Кәсіпкердің айтуынша, құрылыс ашық жүргізілген, ал әкімдік өкілдері нысанның ашылу салтанатында болған.

Аялдамада жолаушыларға арналған күту бөлмесі кондиционермен жабдықталған, тегін ішуге арналған су құрылғысы мен стақандары қойылған. Жанында кофехана жұмыс істейді, бөлек әжетхана да бар.

- Енді осыны бұзады деп жатыр, қалайша? Кезінде жерді неге жалға берген? Күту бөлмесінде барлық жағдай жасалған жұртшылық үшін. Бюджеттің қаржысына бірнеше млн-дап қаржы жұмсап аялдама салды, әйтеуір жоқтан жақсы. Бірақ дәл осындағыдай жағдай жасалмаған. Мынау орталық жер, аялдама жарқырап қалаға сән де беріп тұр, енді алып тастайды дегенге қарсымыз, - дейді бір топ тұрғын. 

Бүгінде Құлбаевқа берген жер учаскесін өтеусіз пайдалануға беру мерзімінің үш жылы бітіп, келісім шартты ұзарту қажет. Алайда кәсіпкер қала әкімдігінен қарсылыққа тап болып отыр. 

2025 жылы ол Жылыой ауданының Қоғамдық кеңесіне мүше болып кірді, ал екі айдан соң төраға болып сайланды. Кәсіпкердің айтуынша, ол қаладағы тазалық, жолдардың жағдайы және мердігерлердің жұмысы туралы мәселелерді көтеріп, әлеуметтік желілерде сын пікірлерін жариялап отырған.

Осыдан кейін, кәсіпкердің айтуынша, жер келісімшартын ұзартуда қиындықтар туындаған.

— Маған Қоғамдық кеңес төрағасы қызметінен бас тартуды ұсынды. Оның орнына кәсіпкерлік жұмысымда кедергі болмайтынын, аялдаманың келісім шартын ұзартатынын айтты. Мен келіспедім. Осыдан соң нысанды ГАСК қызметкерлері тексеріп, кемшіліктер көрсетті. Бірақ үш жылға дейін ГАСК неге тексермеді? — дейді ол.

Құлбаев сондай-ақ нысанды мемлекеттік меншікке айналдыруға әрекет жасалып жатқанын айтады. Оның сөзінше, павильон тек өзінің жеке қаражатына салынған.

- Егер бұзуға жататын нысан болса о баста әкімдік жерді неге береді, аялдаманы салуға рұқсат бергенін неге ұмытады? Кезінде қолдау танытқан әкім неге үнсіз?. Бұл қудалау тікелей қоғамдық Кеңес төрағасы қызметінен бас тартпағаным үшін болып отыр, - дейді Құлбаев.     

Кәсіпкердің осыншама айыптауларынан кейін «АЖ» редакциясы Құлсары қаласының әкімі Қадыржан Адиновқа бірнеше рет телефон соқты, жазбаша сұрақ та жіберді. Алайда сұрақтарымызға нақты жауап ала алмадық. Әкім бір сөзінде «кәсіпкер заңды бұзып отыр» деген болатын, бірақ нақтысы айтылмады. 

Құлбаев аялдаманың бұзылуына жол бермейтінін, кәсіпкерлік құқығын қорғайтынын мәлімдеді.  

«АЖ» редакциясы бұл мақаламен тоқталып қалмайды, назарда ұстайтын болады. 

Ләззат ҚАРАЖАНОВА    

Бүгін, 13:05