Құлсарыдағы оқушылар толы мектеп тиімсіз деп жабылмақ

Құлсары қаласындағы №20 мектеп 340 орынға есептелген, қазір онда 300-ден астам бала оқып жүр. Алайда келесі оқу жылынан бастап мектепті жабу көзделіп отыр. Айта кетерлігі, дәл осы мектептің жүктемесі тым жоғары болғандықтан, жанында қосымша корпус салу жұмыстары әлі де жалғасуда.

300 орындық бұл білім ошағы 1993 салынған. Жылдар өте келе оқушылар саны артып, сынып бөлмелері мен асхананың өзі айналымға келмей тар болып қалған. 2023 жылы білім ошағын кеңейту мақсатында қасынан тағы бір мектептің құрылысы басталған.

2024 жылы болған су тасқыны кезінде мектеп құрылысы тоқтап қалып, кейін жалғастырған. Мердігер "СұңқарҚұрылысLTD" ЖШС құрылыс жұмысын 2025 жылдың 25 желтоқсанына дейін аяқтау жөнінде соңғы уәдесін бергенімен қосымша мектеп құрылысы толық бітпей, тапсырылмастан тұр.

Енді келіп Жылыой аудандық әкімдігі 300 оқушыны "Келешек" мектебіне көшіру жөнінде шешімге келген.

- Бұл мектептің жабылуына қарсымыз. Неге қосымша мектеп құрылысын салып жатыр, енді келіп оқушыларды "Келешек" мектебіне көшірмекші. Бұл қаланың шетінде орналасқан, қашық, балаларымыздың барып келуіне қиындық туғызатыны сөзсіз. Олар қалай қатынайды? Неге ата-аналармен келіспеген,-дейді «Автожолшылар» ықшамауданындағы ашынған ата-аналар. 

Осыған орай әкімдігі себебін түсіндірді:

- 300-ден астам оқушы үшін 50-ге жуық мұғалімнің болуы экономикалық жағынан тиімсіз. №20 жалпы орта білім беретін мектеп ғимараты 340 орындық дегенмен де сынып бөлмелері тар, санитарлық-гигиеналық талаптарға сәйкес келмейді. "Келешек" мектебінің ықшам ауданнан қашықтығы 1,6 шақырымды құрайды. Оны да ескеріп жатырмыз,  ата-аналар мен оқушылар үшін қоғамдық көліктер қарастырылады. №20 орта мектеп ғимараты орнына қосымша білім беру ұйымы ашылып, балаларды қосымша біліммен қамту жоспарда бар,-дейді аудан әкімінің орынбасары Гүлнафис Айшуақова.

Мектептің нақты толымдылығы жобалық қуатына жақын. Қосымша корпус дәл осы орын тапшылығына байланысты салына бастаған еді. Алайда құрылысқа қанша қаражат жұмсалғаны, нысанның қай кезеңде тұрғаны және мерзімнің бұзылуына кім жауапты екені туралы ақпаратты әкімдік нақтылаған жоқ.

Ата-аналар түсініктеме беруді және қабылданған шешімді қайта қарауды талап етпек. Даулы жағдайға айналған мектептің болашағы әзірге белгісіз.

Сонымен дау тудырған мектеп жайы болашақта қалай шешілетіні белгісіз. 

Ләззат ҚАРАЖАНОВА

Суретті түсірген автор

Бүгін, 13:27