Алматылық оқушылар мектеп студиясынан ғаламторға жаңалықтар шығарып жүр

Кәсіби деңгейдегі мектеп телевизиясы.

Алматылық оқушылар Urpaq Uni Media жобасын қолға алды. Нағыз кәсіби студияда эксклюзивті жаңалықтар дайындап, мағыналы подкасттар түсіріп жүр. Өнімдерін YouTube арнасына жүктейді. Тіпті өз газеті бар. Оқушылардың түсірген материалдары TikTok-та 3 миллионнан аса қаралым жинаған.

Мына кадрлардың дәстүрлі телевизиядағы өнімнен еш айырмашылығы жоқ. Логотип, геотитр бәрі бар. Тек бұл кәсіби студияда емес, №174 мектеп-гимназияның мына шағын кабинетінде жасалған. Тілші де, оператор да, бейнеинженер де оқушылар. Олардың медиаәлемге деген қызығушылығын байқап, мектеп әкімшілігі арнайы кабинет жасақтап беріпті. Қажетті техникаларын да сайлап алған.

Әбдірахман Қайрат, 11-сынып оқушысы:

- Біз мектепке келген журналист аға әпкелерімізден сұрастырдық. Сіздерде қандай микрофон, қандай камера деген сияқты. Соны мектебіміздің бас есепшісіне жіберіп, кәсіби түсірілм жасау үшін кәсіби дыбыс жазу керек деп айттық. Оның бағасы да арзан тұрмайды екен. Бір микрофонға жалпы 500 мыңнан артық қаражат кетті.

Urpaq Uni медиа орталығы шағын подкасттар түсіріп, жаңалық таратады. Оқушылар мектеп ішінде ғана емес, қала, аудан көлемінде болып жатқан шаралардың ортасынан табылып, репортаждар жасайды. «Ашық микрофон» жобасы да тұрақты түрде ай сайын экранға шығып тұрады. Мақсат – жас ұрпақтың өз ойын еркін жеткізуге мүмкіндік беру, дейді жас өрендер.

Әбдірахман Қайрат, 11-сынып оқушысы:

- Бұл біздің мектептегі әлеуметтік жоба деп айтсақ болады. Жасөспірімдер тұйық болып бара жатыр. Сондықтан біз өзімізді ғана дамытып қана қоймай, мектептегі өзге де оқушыларды дамытуға жол аштық. «Ашық микрофон» айдарында оқушылар мектепке не жетіспейді, директорға қандай ұсыныс айтады деген секілді өздерінің ойларын айтады.

Медиаорталықта оқушылар 8 беттік Urpaq Uni газетін баспаға дайындап, жарыққа шығарып отыр. Мектеп өмірі, қызықты кейіпкерлерге арналған 100-ге жуық айдары бар газет айына бір рет шығады. Басылым тіпті Мәдениет және ақпарат министрлігінде тіркеліп, арнайы куәлік алған.

Жеткіншек Меңдіғалиев, қазақ тілі мен әдебиеті пәнінің мұғалімі, "Ұрпақ үні" газетінің бас редакторы:

- Газеттің берер пайдасы көп. Балаларды біріншіден  мақала жазуға үйретеді, газет. Оқуға сауаттылыққа үйретеді. Екіншіден бұл газет мұғалімдерге де пайдалы. Мұғалімдер мақала жазса, бұл лицензия алған газетіміз, болашақта мұғалімнің категория алуына өзіндік бір септігін тигізеді. Лицензиясы бар газеттің категорияда, комиссияда құны жоғары.

Қазіргі таңда газеттің негізгі оқырмандары – мұғалімдер, оқушылар және олардың ата-аналары. Ал жаңалықтар арнасының аудиториясы әлдеқайда кең – олар әлеуметтік желі пайдаланушылары. Оқушылардың тележобалары жарты жыл ішінде үш миллионнан астам қаралым жинаған.

Гүлжан Көленқызы, Радик Жакупов