Құлсарылық педофил өмір бойына бас бостандығынан айырылды

"АЖ" мұрағатынан

Атырау облысының мамандандырылған ауданаралық қылмыстық істер жөніндегі сотында судья Зарема Хамидуллина Құлсары қаласында 7 жасар қызды зорлап, өлтірген күдіктіге қатысты резонансты іс бойынша үкім шығарды.

Қайғылы оқиға 5 маусымда болған: қыз бала құрбыларымен ойнау үшін көшеге шыққан, үйіне қайтып бара жатқанда адасып кетеді. Жолда ер адамды кездестіреді. Сөйтіп үйіне қайтып оралмаған. Кейін оның денесі Құрсай өзені маңынан табылды.

Тергеу барысында 35 жастағы ер адамның алкогольдік мас күйде болып, баланы зорлағаны анықталды. Қылмыстың ізін жасыру үшін ол қызды тұншықтырып, денесін өзенге тастаған. Іс материалдарында көрсетілгендей, содан кейін күдікті дүкеннен ішімдік сатып алып, ішіп, танысының ауласында ұйықтап қалған. Қыздың денесі 12 сағаттан кейін табылған.

Сот-медициналық сараптама дене жарақаттарын, жыныстық зорлық пен тұншықтыру белгілерін анықтады. Айыпталушының әрекеті ҚР Қылмыстық кодексінің екі бабына сәйкес сараланды:

120-бап, 4-бөлік («Кәмелетке толмағанды зорлау»);99-бап, 3-бөлік («Кәмелетке толмаған баланы қасақана өлтіру»).

Сотталушы кінәсін мойындамағанымен, оның қылмысқа қатысы куәгерлердің айғақтары, бейнежазбалар және сараптама нәтижелері арқылы толық дәлелденді.

Сот үкімімен ол ерекше қауіпсіздік режиміндегі мекемеге өмір бойына бас бостандығынан айыру жазасын алды. Сонымен қатар, жәбірленуші тарапқа моральдық зиян ретінде 20 000 000 теңге өндірілді.

Судья Зарема Хамидуллина сот залында: 

- Бейбіт заманда, дамыған қоғамда, болашағы енді ғана басталған кінәсіз баланың өмірін қиып, аса қатыгездік пен адамгершілікке жат әрекет жасау — бұл тек жәбірленушіге емес, бүкіл қоғамға моральдық соққы. Мұндай қылмыстар гуманизм негізін шайқалтып, қоғамдық тыныштықты бұзады, адамдардың қауіпсіздік пен әділетке деген сенімін жоғалтады, бейбіт өмірімізді қараңғы етеді, - деді.

Соңғы жылдары Қазақстанда балаларға қарсы жасалған қатыгез қылмыстарға қатысты жазаны күшейту мәселесі жиі көтерілуде. Әлеуметтік желілерде педофилдер мен кісі өлтірушілерге өлім жазасын қайтару туралы талаптар айтылып жүр.

Алайда Қазақстан Республикасының қолданыстағы заңнамасына сәйкес ең жоғары жаза — өмір бойына бас бостандығынан айыру. Мұндай сотталғандар жазасын ерекше қауіпсіздік режиміндегі мекемелерде өтейді — бұл ең қатаң бақылау, оқшаулау және тәртіп талаптары бар түрмелер.

Айгүл МАНСУРОВА

Бүгін, 13:01