Құқық қорғау органдары келіссөз жүргізудің тәсілдерін меңгереді

Құқық қорғау органдары қызметкерлеріне бейбіт жиындар мен наразылық шерулері кезінде халықпен сындарлы диалог жүргізу дағдылары үйретіледі.

Ішкі істер министрлігі мен «Адам құқықтары жөніндегі хартия» қоғамдық қоры ұйымдастырған 5 күндік семинар-тренинг Қостанай академиясында өтіп жатыр. Оған оқытушы-модератор ретінде белгілі социолог, психолог мамандар шақырылған.

Треннингке еліміздің әр түкпірінен елуден астам құқық қорғау органдарының қызметкерлері қатысып жатыр. Олар бес күндік оқу семинары барысында бейбіт шерудің бүлікке, бейберекетсіздікке ұласуына жол бермеудің әдіс-тәсілдерін үйренеді.

Гүлмира Илеуова, әлеуметтанушы:

- Наразылық шерулеріне біздің қоғам көпшіліктік құбылыс ретінде қарайды. Ол қате түсінік. Жеке адамдардың белсенделігі ескеріле бермейді. Топ ортасындағы ұйымдастырушылардың психологиялық жай-күйі есепке алынбайды. Әдетте олар кедей емес, тұрақты жұмысы бар, ауқатты адамдар. Ол не үшін осындай әрекетке барып отыр, соны дұрыс диалог құру арқылы анықтап, тез арада шешімін таба білу қажет.

«Негізінен шерушілермен қоғамдық тәртіп сақшылары бетпе-бет келіп жатады. Сол кезде ұстамды болып, азаматтармен тіл табыс білу аса маңызды», - дейді полиция қызметкері Ерболат Хусаинов.

Ерболат Хусаинов, Ақмола облыстық ПД Қоғамдық қауіпсіздік басқармасы басшысының орынбасары:

- Полиция қызметкері бас кезінде шиеленіс туындап жатқан жағдайда қолма-қол шара қолдану қажет. Адамдармен кездесіп, сөйлесіп, ашық түрде болу керек. Бұл өте маңызды және тілі бай болу қажет. Ол үшін жоғарғы тәжірибе керек.

Семинар-треннинг тыңдаушылары қатарында ІІМ Шырақбек Қабылбаев атындағы Қостанай академиясының және Ақтөбе заң институтының оқытушылар бар. Болашақта жиналған тәжірибе материалдар оқу бағдарламасына еңгізілмек. Қоғамдық келісім мен диалог мәдениетін дамытуға бағытталған бағдарламаны мемлекеттік органдар мен  азаматтық қоғам өкілдері бірлесе дайындауға ниетті.

Жеміс Тұрмағамбетова, «Адам құқтары жөніндегі хартия» ҚҚ атқарушы директоры:

- Ұлттық тренерлерді дайындасақ, олар әрі қаратай алып кетсе, сонда әрбір полиция учаскесінде осындай адамдар, қай жерде қандай жағдай болып жатыр, ең бірінші бұлар келісімсөзге келіп, соны шешуге тырысады. Содан кейін барып қана басқа да шаралар қолдануы мүмкін.

«Қоғамдағы өзекті мәселелердің барлығы тек ашық әрі өзара құрметке негізделген диалог арқылы шешіледі. Сондай-ақ сындарлы диалогке мемлекетпен бірге азаматтық қоғамда мүдделі болуы тиіс», - дейді «Адам құқтары жөніндегі хартия» қоғамдық қорынының атқарушы директоры Жеміс Тұрмағамбетова.

Треннинг соңынан барлық қатысушыларға ұлттық тренер деген сертификат беріледі. Олар алған білімдерін құқық қорғау жүйесінде кеңінен таратып, қолданысқа еңгізетін бастамашыл топ болмақ.   

Авторлары: Мағауия Қалиев, Сергей Трахтенберг