Құрылтай қайда орналасады: Парламент ғимараттарының тағдыры

Жаңа Конституция жобасында Құрылтайдың өкілеттіктері, құрамы және жұмыс мерзімі көрсетілген. Егер құжат референдумда мақұлданса, Конституция жобасының өтпелі ережелеріне сәйкес, ел Президенті Құрылтайға сайлау туралы бір ай ішінде жариялап, Конституция күшіне енген күннен бастап екі ай ішінде өткізілуі тиіс.

Өз кезегінде Парламент Сенаты Құрылтай қазіргі Парламент ғимаратын пайдалана ма деген сұраққа жауап берді.

– Референдум нәтижесіне сәйкес, қазіргі Парламенттің инфрақұрылымын толық немесе ішінара қолдану мәселесін талқылау жұмыстары басталады. Екі ғимарат та депутаттық корпус үшін дайын және жеткілікті деңгейде жабдықталған. Сондықтан Құрылтай құрылғаннан кейін, көршілес құрылымдармен бірлесіп депутаттық корпус жұмысына жауап беретін аппарат та жасақталады. Олар залдарды, ғимараттарды және басқа да мәселелер бойынша шешім шығарады, – деді Сенат аппаратының жетекшісі Максим Споткай агенттік тілшісіне берген жауабында.

Қазіргі уақытта ел Парламенті 1995 жылғы Конституция бойынша жұмыс істейді. Парламент екі палатадан тұрады: төменгі палата – Мәжіліс (98 депутат) және жоғарғы палата – Сенат (50 депутат).

Мәжілісмендер мен сенаторлар Парламент кешенінде – екі бөлек ғимаратта отырады. Оларды жалғайтын өтпелі галерея бар. Мәжіліс үйінің 19 қабаты, Сенаттың – 16 қабаты бар. Қасында Үкімет үйі, Жоғарғы сот және Ақорда орналасқан және олар 20 жылдан астам уақыт бойы бірге астананың әкімшілік орталығы ансамблін қалыптастырып келеді.

Парламент ғимараттарының жобасы 2002 жылы жасалған, ал құрылыс 2004 жылы басталған. Әр ғимаратта пленарлық отырыс залдары, депутаттар мен комитет кабинеттері, кітапхана және халықаралық кездесулерге арналған залдар бар. Кешен орталығында 400 орындық палаталардың бірлескен отырыс залы орналасқан.

Тәуелсіздік жылдары елдің жоғарғы өкілді органының құрылымы алғаш рет өзгергелі тұр – бұл ауқымды реформа Парламенттің 30 жылдығымен қатар жүргізіліп жатыр. Жаңа Конституция жобасының өтпелі ережелеріне сәйкес, егер референдумда мақұлданса, қазіргі Парламент осы форматта 2026 жылғы 1 шілдеге дейін жұмыс істейді.

Еске сала кетсек, Қазақстан Республикасының жаңа Ата Заңының қорытынды жобасы жарияланды. 

Мемлекет басшысы Қасым-Жомарт Тоқаев 2026 жылғы 15 наурызда республикалық референдум өткiзу туралы Жарлыққа қол қойды.