Құрылыстағы отандық өнімдер үлесі 70% ға жетті

Құрылыста сырттан келетін өнімдерге сұраныс азайып келеді. Нарықтағы импортты отандық материалдар алмастырды. Қазіргі үлесі 70 пайыздың шамасында. Сарапшылар ірілі-ұсақты өндіріс ошақтарының көбеюі және құрылыстың қарқын алуы көрсеткішті еселейді деп сенеді.

Құрылыс нарығындағы отандық материалдардың үлесі 60 пайыздан 70 пайызға дейін артты. Бұл аз ғана уақыттағы жетістік. Индустрия және экспорт орталығының сарапшылары елде құрылыс қарқыны ғана емес, өндірушілердің де белсенділігі артып келе жатқанын айтады. Әсіресе құрғақ қоспалар өндірісі айтарлықтай өсіп,  млн тоннадан асты. Бұған ірі кәсіпорындардың көбеюі ықпал еткен. Олардың басым бөлігі Алматы, Астана қалалары мен Ақтөбе, Абай облыстарында жұмыс істеп жатыр. Сапалы өнімге шикізат Еуропадан жеткізіледі.

Құрылыс материалдарының импорты азайды

Иә, нарықта отандық құрылыс матералдарының үлесі артып жатыр. Демек сұраныс бар. Тіпті кей өнімдердің импорты кәдімгідей азайған. Мәселен, тауарлы бетон толықтай өзімізде өндіріледі, бетоннан жасалған өнімдер үлесі 99 пайызға жуықтады. Отандық гипс картоны 74 пайыздан асады, гипстен жасалған өнімдер үлесі 72 пайыздан асқан. Лак, бояу түрлері 65 пайызға жетті. Қалғаны сыртқы нарықтан әкелінеді.

Құрылыстағы отандық өнімдер:

Бетон өнімдері - 98,7%

Тауарлы бетон - 100%

Гипс картоны - 74,5%

Гипс өнімдері - 72,5%

Лак бояулары - 65,8%

Құрылыста отандық өнімдердің көп болуы маңызды. Бұл салынған нысанның бағасына тікелей әсер етеді. Құрылысшылар одағы сырттан келетін материалдар теңгемен емес, басқа валюталармен бағаланатынын айтады. Бұған логистика, кедендік төлемдер, т.б. шығындар қосылады.

Вячеслав Лазарев, «Қазақстан құрылысшылары одағы» РҚБ Астана қалалық филиалының директоры:

- Тұрғын-үй құнының негізгі бөлігі құрылыс материалдарынан тұрады. Қазақстан оның жартысын шетелден тасиды. Көбіне ішкі әрлеу жұмыстары мен қасбетіне жұмсалатын материалдарды импорттаймыз. Сондықтан өзіміздің замануи зауыттарымызды салу керек.

ӨҚМ: Ипотекалық бағдарламалар жеткілікті

Жаңа жылдан бастап, «Наурыз» бағдарламасын қаржыландыруға 500 млрд теңге бөлінеді. Бұл биылғыдан екі есе көп. Өнеркәсіп және құрылыс вице-министрі Қуандық Қажкеновтың айтуынша, «Наурыз жұмыскер» бағдарламасына да сұраныс артып жатыр. Ипотека рәсімдеушілердің 60 пайызын 35 жасқа толмағандар қамтыған. Үкімет тиімділігін дәлелдеген бағдарламаларды жалғастыруға ниетті.

Қуандық Қажкенов, ҚР Өнеркәсіп және құрылыс вице-министрі:

- Қазір жаңа бағдарламалар енгіземіз деген жоспар жоқ. Қазір нарықта әлеуметтік осал топтарға арналған бағдарламалар, «Наурыз» бар. Отбасы банктің өз бағдарламалары да жетерлік. Сондықтан, мемлекет жаңа ипотекалық бағдарлама енгізбейді.

«Жыл қорытындысы бойынша елде 19 млн шаршы метр тұрғын үй пайдалануға берілуі керек. Қазір құрылыс саласы цифрлық жүйеге көшіп жатыр. Жаңа жылда жобалар циклының негізгі кезеңдерін қамтитын портал іске қосылады. Яғни бірқатар маңызды бағыт бір платформада топтастырылады. Бұл уақыт үнемдеуге және ашықтықты қамтамасыз етуге мүмкіндік береді», - дейді мамандар.