Отандық өнімдер Шанхай көрмесінде таныстырылды

Шанхайда 8-ші халықаралық импорт тауарларының көрмесі өтті. Қазақстанан барған 100-ге жуық компания да өз өнімдерін ұсынды. Шетелдік сатып алушылар мен мамандарды қандай отандық тауарлар қызықтырды? 

Шанхайдағы халықаралық импорттық тауарлар көрмесіне еліміз биыл сегізінші рет қатарынан қатысып жатыр. Әр жыл сайын көрмеде ұсынылатын тауарлар саны артып, қатысушы отандық компаниялар көбейіп келеді. Беделді іс-шара аясында ұлттық мәдениетіміз де жан-жақты таныстырылуда. Қонақтарға ұлттық музыкалық аспаптарда шығармалар орындалып, ұлттық киім үлгілері ұсынылды. 

Айтмұхаммед Алдажаров, "Qaztrade" ұлттық экспортты ілгерілету операторының бас директоры:

- Биыл Шанхайдағы көрмеге Қазақстаннан шамамен 100 компания келді. Бұған дейін өнімдеріміз тек бір жерде, ұлттық павильонда ғана қойылатын. Ал биыл Қазақстан төрт түрлі алаңда таныстырылып отыр.

Мұнда отандық компаниялардың арасында бірнеше тұрақты қатысушы бар. Бұл кәсіпорындар көрмеге жыл сайын қатысады. Себебі алаң өнімнің шынайы нарықтық сұранысын бағалауға мүмкіндік береді. Келушілермен тікелей байланыс компанияларға қандай тауарлардың өтімді, қай бағытты дамыту қажет екенін анықтауға көмектеседі.  

Бақшагүл Нұрмолдина, «Гормолзавод» компаниясының даму бөлімінің басшысы:

- Бұл көрмеге біз екінші рет қатысып отырмыз. Биыл үш жаңа өнім әкелдік. Көрменің алғашқы күнінен бастап келушілерден белсенді кері байланыс алып жатырмыз. Сол пікірлерге қарағанда, шоколад қосылған ірімшігіміз ерекше сұранысқа ие. Сондықтан Қытай нарығына дәл осы өніммен шығу қажеттігін байқап отырмыз.

Көрмеге биыл алғаш рет қатысып отырған жаңа компаниялар да аз емес. Олар үшін басты мақсат - Қытай нарығына шығудың мүмкіндігін пайдаланып, тұтынушылардың сенімін қалыптастыру. Ол үшін ең маңызды талап нарыққа бәсекеге қабілетті бағамен сапасы жоғары өнім ұсыну.

Павел Шерстнёв, жеміс-көкөніс өнімдерін өндіруші компанияның жетекшісі:

- Бұл Қытайдағы біздің алғашқы көрмеміз. Көрмеге алма пішініндегі кәмпиттерімізді әкелдік. Қазақстан алманың отаны болғандықтан, біз осы жемісті елдің дәмін, табиғи ерекшелігін және ұлттық мақтанышын білдіретін өнім ретінде ұсындық. Қазір қытайлық серіктестермен әріптестік жөнінде келіссөздер жүргізіп жатырмыз.

Көрме Қытайдың жаһандық өндірушілер үшін сенімді серіктес және маңызды нарық мәртебесін сақтап отырғанын көрсетеді. Іс-шара шеңберінде жаңа келісімдер рәсімделіп, ұзақ мерзімді серіктестіктер құрылып жатыр. Ашық сауда қатынастарын ілгерілететін жаңа алаңдар қалыптасуда.

Авторы: Динара Орынтай