Құтқарушылар Астанада және Жамбыл облысында суға батып бара жатқандарға көмекке келді

Елордалық құтқарушылар Есіл өзеніндегі қайғылы жағдайдың алдын алды: ер адам суда қауіпті жағдайға тап болған. Ал Жамбыл облысы Шу ауданындағы Тасөткел су қоймасында Қырғызстан азаматтары мінген қайық аударылып кетті, деп хабарлайды Tengrinews.kz ТЖМ-ге сілтеме жасап.

Елордалық құтқарушылар Есіл өзеніндегі қайғылы жағдайдың алдын алды: ер адам суда қауіпті жағдайға тап болған. Ал Жамбыл облысы Шу ауданындағы Тасөткел су қоймасында Қырғызстан азаматтары мінген қайық аударылып кетті, деп хабарлайды Tengrinews.kz ТЖМ-ге сілтеме жасап.

Астана қаласындағы Есіл өзенінің айдынын патрульдеу кезінде құтқарушылар Қараөткел көпірінің маңында суға батып бара жатқан ер адамды байқап қалған.

"ТЖМ құтқарушылары Байбұлан Секербаев пен Ерлан Тілеубаев жүрдек құтқару қайығымен 5 шақырымға жуық қашықтықты небәрі 3 минутта жүзіп өтіп, құтқару шеңберінің көмегімен азаматты судан шығарып, жағаға жеткізді", - деп хабарлады ТЖМ.

34 жастағы ер адам полиция қызметкерлеріне тапсырылған. Оған қатысты Қазақстан Республикасының Әкімшілік құқық бұзушылық туралы кодексінің 412-бабына сәйкес әкімшілік шаралар қолданылады.

ТЖМ өз қызметкерлерінің кәсібилігі мен жеделдігін атап өтіп, азаматтарды судағы қауіпсіздік ережелерін сақтауға, белгіленбеген жерлерде шомылмауға, суға мас күйінде түспеуге және тек жабдықталған жағажайларда демалуға шақырды.

Жамбыл облысы Шу ауданындағы Тасөткел су қоймасында Қырғызстан азаматтары қайықпен балық аулауға шыққан. Біраз уақыттан кейін құтқару қызметінің пультіне қайықтың аударылып кеткені және балықшылардың бірі суда қалғаны туралы хабарлама түскен.

Су қоймасының айдынын патрульдеп жүрген ТЖМ жедел-құтқару жасағының қызметкерлері оқиға орнына бағыт алған.

"Ер адам жедел түрде табылып, судан шығарылды. Ол медициналық көмекке мұқтаж болған жоқ", - деп хабарлады ТЖМ.

Ер адамның айтуынша, олардың қайығын жел жағадан алысқа айдап кеткен, содан кейін ол аударылып қалған.

ТЖМ өңір тұрғындары мен қонақтарына су қоймаларында қауіпсіздік ережелерін қатаң сақтау, құтқару кеудешелерін пайдалану және қолайсыз ауа райында суға шықпау қажеттігін еске салды.