Қысқы Олимпиада: медаль алуға мүмкіндігі жоғары спортшылардың есімі жарияланды

АСТАНА, 30 желтоқсан – Sputnik. Туризм және спорт министрі Ербол Мырзабосынов әлемдік рейтингте көшбасшылардың тізіміне кіруге мүмкіндігі жоғары спортшыларды атады, деп хабарлайды Sputnik Қазақстан тілшісі.

Бүгін үкімет отырысында министр Қысқы Олимпиадаға дайындық шаралары жайында есеп берді. Оның айтуынша, әлемдік рейтингте көшбасшылардың біріне айналуға мүмкіндігі бар спортшылардың тізімі жасалған. Олардың барлығы биыл халықаралық жарыстарда медаль жеңіп алған.

"Мысалы, Анастасия Городко фристайл-могулдан жасөспірімдер арасында 2025 жылғы әлем чемпионы, сондай-ақ ересектер арасындағы әлем чемпионатының қола жүлдегері.

Мәнерлеп сырғанаудан 2025 жылы Михаил Шайдоров әлем чемпионатының күміс жүлдегері атанса, әйелдер арасындағы Гран-приде Софья Самоделкина алғашқы тарихи күмісті жеңіп алды", - деді Мырзабосынов.

Бұдан бөлек, шорт-тректен Денис Никиша 2024 жылғы жетістігін биыл тағы қайталап, әлем чемпионатында күміс жүлдегер атанды. Ал конькимен жүгіруден Евгений Кошкин 2025 жылғы Әлем кубогының кезеңдерінде екі алтын медаль жеңіп алды. Азия ойындарында Шерзод Хаширбаев пен Роман Иванов фристайл-акробатикадан Қытайдың екі фаворит командасын жеңіп, алтын медальға қол жеткізген.

"1994 жылдан бері 8 Олимпиадада бес-ақ спортшы медаль алған. Өкінішке қарай, 2018 жылдан бері бірде-бір медаль жоқ. Сондықтан біз медаль алуға барлық жағдайды жасап жатырмыз”, - деп атап өтті Мырзабосынов.

Айта кетері, Қысқы Олимпиада 6-22 ақпан аралығында Италияда өтеді. Қазақстан құрамасы биатлон, конькимен жүгіру, мәнерлеп сырғанау, шорт-трек, тау шаңғы спорты, шаңғы қоссайысы, шаңғы жарыстары, шаңғымен трамплиннен секіру, фристайл-могул және фристайл-акробатикадан жарысқа түседі.