Италияда қысқы Олимпиада ойындары өтеді

Төрт жылда бір келетін қысқы Олимпиада ойындарына да аз күн қалды. Дүбірлі дода Италияның қос қаласында өтеді. Милан және Кортина-д'Ампеццо шаһарлары XXV қысқы Олимпиада ойындарын өткізу байқауында 7 мемлекет ішінен озып шыққан. Енді бұл жақта олимпиада қалашығының құрылысы қаншалықты дайын? Ойынға кімдер келеді? Ерекшелігі неде?

2026 жылы өтетін ХХV қысқы Олимпиада ойындарына дайындық қызу. Ойындар 6-22 ақпан аралығында Италияның Милан және Кортина-д'Ампеццо қалаларында өтеді. Апеннин түбегінде Олимпиада ойындары осымен төртінші мәрте ұйымдастырылады. Жарысқа 93 елден 3500 спортшы қатысады деп жоспарланған. Бұл халықаралық додада 16 спорт түрінен 195 медаль ойналады. Ауқымды іс-шараны өткізу үшін 18 000 ерікті жұмылдырылып, тағы 50 000 ерікті қоғамға бағытталған кең ауқымды бастамаларға қатысады. Олимпиаданың салтантты ашылу рәсімі Сан-Сиро стадионында, ал жабылу рәсімі тарихи Верона сахнасында болады. Шаңғы спорты алғаш рет қысқы Олимпиада бағдарламасына жеке спорт түрі ретінде енгізілді.

Андреа Варнье, ұйымдастыру комитетінің бас директоры:

- Олимпиада ойындары араға 20 жыл салып Еуропаға, қысқы спорт түрлерінің нағыз отаны Альпіге қайта оралады. Бұл өте маңызды сәт болғалы тұр. Жауапкершілік пен қобалжу басым.

«Ең ұлы саяхат». Осындай атаумен 63 күнге созылатын алау эстафетасы 12 мың шақырымды бағындырады. Алдағы жылы қысқы Олимпиаданың ашылу рәсімі алғаш рет екі қалада қатар өткелі отыр. Олимпиаданың басты нышаны, бейбітшілік, достық және әлем халықтарының бірлігін білдіретін белгі – Олимпиада алауы алғаш рет қос шаһарда бір уақытта тұтанады. Қазір елде жарыс нысандарының 85%-і сақадай сай. Миланда Олимпиада қалашығының құрылысы аяқталуға жақын. Ойындардан кейін ол студенттерге арналған тұрғын үй кешені ретінде пайдалануға беріледі. Ал қатысушы елдер жаңа спорттық киімдері мен жабдықтарын дайындап әлек. Әрқайсы қанжығамыз майлы болса деп тілейді, әрине.

Сэм Макуга, америкалық спортшы:

- 2026 жылғы қысқы Олимпиада ойындарына бір отбасынан үш апалы-сіңлі қатысқалы отырмыз. Үшеуміз үш түрлі спорт түрінен бақ сынаймыз. Мен трамплиннен секіруден, ал екі сіңлім шаңғы мен фристайл бойынша жарысады. Бәсеке емес, өзімізге деген сенім басым. Жеңіспен ораламыз деп сенеміз.

Ал БҰҰ Бас Ассамблеясы Италияда өтетін қысқы Олимпиада кезінде олимпиялық бітімгерлікті сақтау жөніндегі резолюцияны қабылдады. Қарарда спортшылардың, ресми тұлғалар мен кіру рұқсатын алған барлық адамның қауіпсіздігі, жарыстарға қатысу және қолжетімділікті қамтамасыз ету мәселелері қамтылған. Құжат спортты бейбітшілік пен ынтымаққа, төзім мен бітімге ықпал ететін құрал ретінде пайдалануға шақырады.

Кирсти Ковентри, Халықаралық Олимпиялық комитеттің президенті

- Әлемде қақтығыстар күшейіп, саяси мәселелер шиеленісіп тұр. Біздің мақсат – спорт пен саясатты бөліп қарастыру. Қысқы Олимпиада ойындарына, жалпы кез келген халықаралық шараға спортшылар еркін қатысуы тиіс. Азаматтардың жарыстарға қатысу мүмкіндігі тең болуы керек. Таңдап алынған спортшылар виза берілмей қалу сынды саяси қауіптерге тап болмауы керек.

Болашақ чемпиондарға арналған медальдар ерекше дизайнмен, екі жартыға бөлініп жасалған. «Бұл спортшының жеткен шыңы мен оған дейінгі ауыр жолын, еңбек пен терді білдіреді», – дейді ұйымдастырушылар. Алдағы 2026 жылдың ақпанында өтетін Олимпиадада қай елдің бәсі биік болатынын уақыт көрсетеді. Ал тағы 4 жылдан кейін қысқы Олимпиада ойындары Францияның Альпісінде өтеді. Кейін 2034 жылы ойынды өткізуге мүмкіндік алған ел – АҚШ. 

Авторы: Нұрбике Жігер