Қытайда есірткі контрабандасымен айналысқан Франция азаматы өлім жазасына кесілді

Ол 2005 жылы тағы басқа 89 күдіктімен бірге тұтқындалған. Бастапқыда сот оны өмір бойына бас бостандығынан айыру жазасына кескен, бірақ 2010 жылы жаңа мән-жайлар анықталғаннан кейін жаза қайта қаралып, өлім жазасына ауыстырылған.

Тергеу мәліметтері бойынша, сотталған адам ірі көлемде есірткі өндірумен, контрабандалық жолмен тасымалдаумен және таратумен айналысатын қылмыстық желінің құрамында болған. Бірнеше жыл ішінде сегіз тоннадан астам героин мен метамфетамин өндіріп, сатқан.

Франциядағы Қытай елшілігі өлім жазасына қатысты ресми мәлімдеме жасады. Мәлімдемеде есірткі қылмысымен күрес барлық елдердің ортақ міндеті екені аталып өткен.

- Қытай – құқықтық мемлекет және барлық айыпталушыларға, олардың азаматтығына қарамастан, тең қарайды, істерді қатаң заңға сәйкес және әділдік тұрғысынан қарайды, барлық тараптардың заңды құқықтары мен тиісті қарым-қатынасын қамтамасыз етеді, – делінген ресми хабарламада.

Бұған дейін Қытай Канада азаматына қатысты өлім жазасын алып тастағаны хабарланған болатын.