Қытайдағы сынақта жаңа диабетке қарсы препарат танымал дәрілерден тиімдірек болды

Компания мәліметінше, UBT251 деп аталатын жаңа препарат зерттеудің екінші кезеңінде қандағы қант деңгейін айтарлықтай төмендетіп, дене салмағын азайтқан.

Зерттеуге Қытайдан 2-типті диабетке шалдыққан 211 ересек пациент қатысты. Бұған дейін олар диета, дене белсенділігі немесе метформин арқылы ем қабылдаған. 24 апта бойы қатысушыларға аптасына бір рет әртүрлі дозада UBT251, семаглутид немесе плацебо енгізілген.

Емдеу қорытындысы бойынша жаңа препаратты қабылдаған топта ұзақ мерзімді қандағы қант деңгейі орта есеппен 2,16%-ға дейін төмендеген. Салыстыру үшін, семаглутид қабылдаған топта бұл көрсеткіш 1,77%-ды, ал плацебо алғандарда 0,66%-ды құраған.

UBT251 салмақ төмендетуде де айқын нәтиже көрсетті. Препаратты қабылдаған қатысушылар дене салмағының орта есеппен 9,8%-ына дейін жоғалтқан. Семаглутид тобында бұл көрсеткіш шамамен 4,8%, ал плацебо тобында 1,4% болды.

Зерттеу барысында жаңа препаратты қабылдаған пациенттердің белі жұқарып, қан қысымы мен қандағы май деңгейі жақсарғаны анықталды. UBT251 қауіпсіздік тұрғысынан осы санаттағы өзге дәрілермен шамалас нәтиже көрсеткен.

Мартин Хольст Ланге компания нәтижелерге қанағаттанатынын айтып, 2026 жылдың екінші жартысында 2-типті диабетке шалдыққан науқастардың қатысуымен ауқымды халықаралық зерттеудің келесі кезеңін бастауды жоспарлап отырғанын мәлімдеді.

Сондай-ақ артық салмағы немесе семіздігі бар шамамен 330 адам қатысып жатқан тағы бір халықаралық зерттеу қазірдің өзінде жүргізіліп жатыр. Оның нәтижелері 2027 жылы жарияланбақ.

Бұған дейін Ұлыбритания мен Бразилияның денсаулық сақтау органдары семаглутид пен лираглутидке негізделген GLP-1 рецептор агонистері тобына жататын салмақ түсіруге арналған танымал препараттарды (Ozempic, Wegovy, Saxenda) қолданған пациенттерде жедел панкреатиттің даму қаупі бар екенін ескерткен болатын.

Осыған дейін Жапонияның Қазақстанға денсаулық сақтауды дамытуға 7 млн доллардан астам гранттық қолдау көрсететіні туралы жаздық.