Қытайға баратын туристерге жаңа ережелерге байланысты мына затты алуға кеңес беріледі

Қытайға баруды жоспарласаңыз, сапарыңызда қарапайым бір зат - көп реттік сөмке немесе шоппер қажет болуы мүмкін. Бұл елде 15 тамыздан бастап бір реттік пластик бұйымдардың кейбір түрін пайдалануға шектеу қоятын жаңа Экологиялық кодекс күшіне енді, деп хабарлайды Tengri Travel.

Не өзгерді?

China Press мәліметінше, 2026 жылғы 15 тамызда Қытайда табиғатты қорғау нормаларының ауқымды жиынтығы - ҚХР Экологиялық кодексі күшіне енді. Құжатта бір реттік пластик бұйымдардың кейбір түрін, соның ішінде ыдырамайтын пластик пакеттерді өндіруге, сатуға және пайдалануға арнайы шектеу бекітілген.

Құжат бір реттік өнімдерді пайдалануды азайтуды және көп реттік әрі басқа да экологиялық баламаларды ілгерілетуді қарастырады. Бұл ретте барлық бір реттік пластикке толық тыйым салу туралы сөз болып отырған жоқ: нақты шектеу өнімнің жекелеген түрлеріне арналған қолданыстағы мемлекеттік ережелерге байланысты болады.

Ыдырамайтын бір реттік пластик бұйымдарды пайдалануға қатысты талаптарды бұзғаны үшін ұйымдар мен басқа да субъектілерге айыппұлдар қарастырылған:

кәсіпорындар үшін - 100 000 юаньға дейін (шамамен 6,8 миллион теңге); жеке кәсіпкерлер үшін - 500-ден 5 000 юаньға дейін (345 мың теңгеге дейін).

Тыйым салынған өнімді өндіру мен сатуға байланысты заңбұзушылықтар үшін жеке жауапкершілік шаралары, соның ішінде айыппұл, ал күрделі жағдайларда лицензиядан айыру қарастырылғаны атап өтілді.

Туристер үшін не өзгереді?

Өзгерістер Қытайда өте танымал дәмханалар, мейрамханалар мен тағам жеткізу қызметтерінде ерекше байқалуы мүмкін.

Шектеуге бір реттік пластик өнімдердің кейбір түрі ілікті: тамақ контейнерлері, тостағандар, тәрелкелер, қасықтар, ас құралдары, сусын ішетін түтікшелер, араластырғыш таяқшалар және пенопласт қаптамалар.

БАҚ мәліметінше, туристер қазірдің өзінде мекемелердегі өзгерістерді байқай алады. Мысалы, пластик түтікшелер мен құралдардың орнына қағаздан, бамбуктан жасалған және басқа да экологиялық нұсқалар жиі қолданыла бастады.

Жақын арада жаңа ереже дүкендерге де қатысты болады. Супермаркеттер мен бөлшек сауда нүктелері жеміс-жидек пен көкөніске арналған кәдімгі пластик пакеттердің, сондай-ақ өзімен бірге алып кететін тағам қаптамаларының орнына біртіндеп биоыдырайтын және қайта өңделген материалдарға көшеді.

Үйреншікті пластик пакеттердің орнына туристерге көп реттік сөмке немесе шоппер алып жүруге кеңес беріледі. Ол сауда жасау үшін де, саяхат кезіндегі басқа да заттар үшін де қажет болуы мүмкін.

Туристерге айыппұл салына ма?

Жоқ, туристің қолында пластик пакет немесе басқа пластик заттың болуы айыппұл салуға негіз болмайды.

Кодексте жауапкершілік, ең алдымен, бір реттік пластик өнімдердің белгілі бір түрін өндіру, сату, пайдалану және есеп беру бойынша бекітілген ережелерді сақтауға негізделген. Атап айтқанда, кәсіпорындар мен басқа да өндірушілер немесе кәсіпкерлер үшін жеке санкциялар қарастырылған.

Сондықтан саяхатшыларға сапар алдында барлық пластик заттан құтылудың қажеті жоқ. Одан да көп реттік сөмке алған әлдеқайда тиімді және кейбір жерлерде үйреншікті тегін пластик пакеттің, түтікшенің немесе басқа бір реттік заттың болмауына дайын болған жөн.

Тағы оқыңыз: Кения шетелдіктер үшін міндетті медициналық сақтандыруды енгізіп жатыр. Жаңа талап елге бір жылға дейінгі мерзімге баратын саяхатшыларға қатысты болады.

Италияда туристерге ерсі әдеті үшін 260 мың теңге айыппұл салынуы мүмкін

Google News арқылы жаңалықтарымызды қадағалаңыз

Жазылу