Қызметкерлерді жұмысқа қабылдауға мораторий: Қазақстанның ХҚО ларында не өзгереді

Қазақстанда ХҚКО-лар жаңа форматқа көшкен кезде қызметкерлерді жұмысқа қабылдау мерзімді түрде тоқтатылып, бос штаттық бірліктер қысқартылып жатыр. Жұмысшылардың тағдыры не болатынын Үкімет отырысынан кейінгі брифингте цифрлық даму, инновациялар және аэроғарыш өнеркәсібі бірінші вице-министрі Ростислав Коняшкин түсіндірді, деп хабарлайды Tengrinews.kz тілшісі.

Қызметкерлердің жағдайы не болмақ?

Коняшкиннің айтуынша, персонал саны арнайы әдістеме бойынша - қызмет көрсетілуі тиіс адамдардың саны мен келушілер ағынының азаюы ескеріле отырып бағаланады.

"Біздің мақсатымыз - қызметкерлерді жұмыстан шығару емес. Осыны бірден баса айтқым келеді. Қазіргі уақытта тек бос тұрған штаттық бірліктер қысқартылды. Біз мезгіл-мезгіл жаңа қызметкерлерді қабылдауға мораторий жариялаймыз және қазіргі жұмыс істеп жүрген мамандарды қысқартпауға тырысамыз", - деді ол.

Коняшкин кадрлардың табиғи ауысуы кезінде лауазымдардың бір бөлігі босайтынын түсіндірді. Бос орындардың белгілі бір саны жиналғанда, олар қысқартылады.

Сонымен қатар бірінші вице-министр алдағы цифрландыру процесі қызметкерлер санына қалай әсер ететінін дөп басып айта алмады.

"Қазір, өкінішке қарай, бұл жағдайдың қызметкерлер санына қалай әсер ететінін нақты болжай алмаймын. Бірақ біз министрлікте де, ведомстволық бағынысты ұйымдарда да жұмысшылардың қамын әрдайым ойлаймыз", - деп сендірді Коняшкин.

ХҚКО-лар халыққа арналған цифрлық кеңселер форматына көшіп жатыр. Ондағы кеңістіктің негізгі бөлігін өзіне-өзі қызмет көрсету аймақтары, құжаттандыру терминалдары және GPT орнатылған терминалдар иеленеді.

"Бұл ретте әзірге eGov арқылы онлайн алу мүмкін емес қызметтерді көрсету үшін небәрі екі-үш оператордың жұмыс орны қалады", - деп түсіндірді бірінші вице-министр.

Қазіргі қызметкерлерді кеңес беру жұмыстарына қайта бағыттау жоспарланып отыр. Жұмысшылардың бір бөлігі мемлекеттік қызмет көрсету процестерін талдау мен өзгертуге, сондай-ақ мемлекеттің азаматтармен және бизнеспен өзара іс-қимылын реттеуге қайта оқытылып жатыр.

Коняшкиннің мәліметінше, азаматтардың ХҚКО-ға жүгінуінің 79 пайызын құрайтын ең танымал он қызметті онлайн форматқа көшіру жұмыстары аяқталуға жақын.

Коняшкиннің мәліметінше, ХҚКО-ларға жасалатын өтініштердің шамамен 79 пайызын құрайтын ең танымал он мемлекеттік қызметті онлайн форматқа көшіру жұмыстары аяқталуға жақын.

Бұған қоса, баламасыз онлайн форматқа ауыстыру жоспарланған тағы 12 қызмет іріктеп алынды.

"Бұл дегеніміз - ХҚКО-ға келген кезде оператор мұндай қызметті көрсетпейді деген сөз. Азамат оны біздің қызметкерлердің кеңес беруімен өзіне-өзі қызмет көрсету секторында ала алады", - деп түсіндірді Коняшкин.

Оның айтуынша, ХҚКО операторларына жүгіну саны шамамен 30 пайызға азайған. Бұл көрсеткіш 2024 жылдың бірінші жартыжылдығын өткен жылдың сәйкес кезеңімен салыстыру арқылы есептелген.

Бұған дейін үкімет сұранысқа ие мемлекеттік қызметтерді цифрландыру ХҚКО-ларға жүгіну санын 30 пайызға қысқартуға мүмкіндік бергенін хабарлаған болатын. 2026 жылдың соңына дейін eGov GPT цифрлық ассистенті арқылы қолжетімді қызметтер санын 150-ге дейін жеткізу тапсырылды.

Бүгін Үкімет отырысында премьер-министр Олжас Бектенов қазақстандықтардың көптеген өтініш беріп жүрмеуі үшін проактивті қызметтерді дамытуды жеделдетуді тапсырды.

Бізді Google-дың негізгі дереккөздер тізіміне қосыңыз