Қызметтен кеткен жоқ: Питер Фостер Турловтың әуе компаниясында не істейді?

Коллаж: ЖИ
Air Astana әуе компаниясының бұрынғы басшысы Питер Фостер Alatau Air Cargo директорлар кеңесінің құрамынан мерзімінен бұрын шықты. Алайда ол ұлттық жүк тасымалдаушы әуе компаниясын құру жобасындағы жұмысын жалғастырады. Енді Фостер компанияның бас директорының аға кеңесшісі қызметін атқарады.
Alatau Air Cargo акционерлері Фостердің өкілеттігін тоқтату туралы шешімді 24 тамызда қабылдаған. Ол тәуелсіз директор қызметінде шамамен үш ай болды — директорлар кеңесінің құрамына 2026 жылғы 22 мамырда сайланған еді.
Алғашында кадрлық шешімнің себептері айтылмады. Forbes Kazakhstan оның өкілеттігі мерзімінен бұрын тоқтатылғанын хабарлап, мұны қызметтен босату деп жазды.
Кейін Turlov Private Holding өкілдері Фостердің жобадан кетпейтінін, тек оның жұмыс форматы өзгеретінін түсіндірді. Kursiv мәліметінше, жаңа қызметінде ол әуе компаниясын қалыптастыру, халықаралық стандарттарды енгізу, операциялық модельді әзірлеу және басқарушы команданы дайындау мәселелерімен айналысады.
Компанияда Фостердің кеңесші қызметіне ауысуын Alatau Air Cargo дамуының жаңа кезеңімен байланыстырды. Жоба корпоративтік басқару жүйесін қалыптастыру кезеңінен операциялық үдерістерді іске қосуға көшіп жатыр.
Директорлар кеңесінде Фостердің орнына жүк әуе тасымалы саласының маманы Роберт ван де Вег сайланды. Оның өкілеттік мерзімі 2028 жылғы 22 мамырға дейін жалғасады. Ол әр жылдары KLM Cargo, Cargolux, Atlas Air және «Волга-Днепр» авиациялық тобының құрылымдарында жұмыс істеген. Қазір Мексиканың MasAir жүк әуе компаниясын басқарады.
Сонымен қатар Alatau Air Cargo бас директоры да ауысты. Нұрлан Жақыпов 17 тамыздан бастап компания басшысының міндетін атқаруды тоқтатты. Бұл қызметке Qazaq Air компаниясын іске қосуға қатысқан басшылардың бірі Блэр Поллок тағайындалды.
Питер Фостер Air Astana әуе компаниясын 2005 жылдан 2026 жылға дейін басқарды. CEO қызметінен кеткеннен кейін де компаниямен ынтымақтастығын жалғастырып, директорлар кеңесінің аға кеңесшісі болды.
Alatau Air Cargo 2025 жылы KTZ Air Cargo атауымен құрылған. 2026 жылдың көктемінде компания акцияларының 50,98%-ы Тимур Турловтың құрылымының бақылауына өтті. Тағы бір акционері — «Қазақстан темір жолының» еншілес ұйымы KTZ Express. Компания ұлттық жүк әуе тасымалдаушысының негізіне айналып, Қарағандыда құрылып жатқан мультимодальды логистикалық хабтың құрамына кіруге тиіс.