Қызылорда облысы орман қоры бойынша алда тұр

Бес жыл бұрын Мемлекет басшысы ел аумағындағы орман қорында 2 млрд ағаш егу туралы тапсырма берді. Бұл жұмыс 2027 жылдың соңына таман аяқталуға тиіс. Қазір орман қоры ұлғайып келеді. Экология және табиғи ресурстар министрлігінің ақпаратына сүйенсек, бүгінге дейін 1 млрд 400 млн ағаш егілді. Былтырдың өзінде орман қоры 400 мың гектарға ұлғайды.

Жалпы біздің елде ең үлкен орман қоры қай өлке деп ойлайсыз? Әрине, тұмса табиғаты таң қалдыратын тал терегі жайқалған өңірлер баршылық. Солардың ішінде орман қоры бойынша алда тұрған Қызылорда облысы екен. Сенбейсіз бе?

Бір жағы тұтас Бетпақдала, Қызылқұм басқа да шөлдермен жалғасып жатқан аймақта расында сусыз көк шығуы қиын. Ал Қызылорда несімен орман қоры бойынша алға шықты дерсіздер. Мұнда сексеуіл көп.

Нұрқанат Қанапия, тілші:

- Қызылорда облысында ағаш қалың. Яғни аймақтағы орман үлесі 17 пайыздан асады. Бірақ бұл негізінен сексеуіл тоғайлары. Экология және табиғи ресурстар министрлігінің мәліметі бойынша облыстағы орман аумағы 4 млн гектарға жуықтайды. Жалпы елдегі 5 облыста ғана орман көлемі 1 млн гектардан асады. Тізімде Қызылордадан кейін Жамбыл тұр. Өңірде 2 млн гектардан аса орман бар. Сондай-ақ алғашқы бесеудің қатарына 1 млн 600 мың гектармен Шығыс Қазақстан облысы, әрқайсы 1,5 млн гектар орманмен Түркістан мен Алматы облыстары еніп отыр.

Ал Сыр өңірі жақын уақытта бәйгенің алдын бермейтін түрі бар. Себебі Президент Арал табанындағы 1,5 млн гектарға сексеуіл егу туралы тапсырма берген еді. Бүгінде 50 млн-ға жуық сексеуіл теңіз табанынан орын тапты.

Бақдәулет Амангелдинов, ҚР ЭТРМ Орман шаруашылығы және жануарлар дүниесі комитетінің бас сарапшысы:

- Орманмен қамтылған жерлер бойынша Қызылорда облысы алда. Олардың 3 млн 800 мың гектар орманмен қамтылған учаскелері бар. Бірақ бұл сексеуіл ормандары дейміз. Жалпы бізде еліміздің оңтүстігінде сексеуіл, ормандары көп орналасқан. Солтүстігі мен шығыс жағына қарай қарағайлы ормандар.

Орман алқабы ұлғайып келеді

Елдегі орман қоры 30 млн гектардан асады. Оның ішінде нақты ағаш өсіп тұрған жер ұлғайып келеді. Егер 2018 жылы 12 млн 900 мың гектар болса, былтыр 400 мың гектар артты. Қазір 13 млн 900 мың гектарда ағаш өсіп тұр. Ал 2030 жылға қарай 14 млн 500 мың гектарға жетуге тиіс. «Яғни 2022 жылғы Қостанай облысындағы, екі жыл бұрынғы Абай облысындағы алапат өрт орман қорының азаюына әсер еткен жоқ», - дейді министрлік өкілі.

Бақдәулет Амангелдинов, ҚР ЭТРМ Орман шаруашылығы және жануарлар дүниесі комитетінің бас сарапшысы:

- Бұған дейін есепке алынбаған орман алқаптарын анықтау немесе орман орналастыру жұмыстарын, одан бөлек отырғызылған ағаштарды орман қорына аудару есебінен осы біздің динамикамыз сақталып отыр.

Министрлік өкілінің айтуынша, орманның көбеюіне қорғау шаралары ықпал еткен. ⁠Бұл жерде заңсыз ағаш кесу мен өрттің алдын алу жұмыстары қамтылған. Жыл басынан бері орман аумағында 600-ге жуық өрт тіркелді. Ал заңсыз ағаш кесу дерегі жүзден асып, айыптылар жазаға тартылды.

Авторлары: Нұрқанат Қанапия, Асхат Қарақойшиев