Қызылорда шекарасынан бастап 50 шақырым жолға асфальт төселді

Қызылорда-Жезқазған трассасының Ұлытау облысына қарасты бөлігінде жолдың негізгі табанын биіктету және су өткізу құбырларын орнату жұмыстары толық аяқталды. Қызылорда шекарасынан бастап 50 шақырым жолға бір қабат асфальт төселді. 

Аймақ басшысы Дастан Рыспеков автожолда жүргізіліп жатқан қайта жаңғырту жұмыстарының қарқынымен танысты. Құрылыс сапасы мен жұмыс мерзіміне қатысты бірқатар тапсырмалар жүктеді.

Жалпы ұзындығы 208 шақырым жолды жаңғырту құны 108 млрд теңге. Төрт халықаралық компания жұмылдырылған. Бүгінге дейін 2,5 млн текше метр топырақ төгіліп, жолдың негізгі табаны биіктетілді. 50 шақырым жолға бір қабат асфальт төселді. Бір көпір мен 40 су өткізу құбыры салынды. Тағы екі көпірдің құрылысы жүріп жатыр.  

Бекбау Слямшаихов, «Қазавтожол» ҰҚ АҚ Облыстық филиалы директорының орынбасары:

- Қазір Қызылорда границасынан 24 шақырым екі жолақты, екі слой жолды ашамыз деп жатырмыз қысқа уақытша. Жол белгілерін қойдық. Бүгін уже ашып, қозғалыс бердік. Келесі жылы үшінші қабат ШМА саламыз. Жалпы биыл 75 километр төсеніш қабат салдық, 65 километр төменгі қабатын салдық. Сонымен қатар қыстай тоқтамаймыз. Келесі жылға қиыршық тастарды дайындаймыз.

Жаңғырту жұмыстарына мыңға жуық адам мен 530 техника тартылған. Құрылыс сапасын техникалық бақылаудан бөлек жол активтері сапасының ұлттық орталығы  тексереді. Осыған дейін мамандар 500-ге жуық сынама алған. 

Бейбіт Иманғалиев, «Жол активтері сапасының ұлттық орталығы» РМК облыстық филиалының директоры:

- Алынған сынамалардың 29-ы талапқа сай келмеді. Кемшіліктер тапсырыс беруші мен мердігерге жіберілді. Бүгінгі таңда біз анықтаған ақаулар толықтай қалыпқа келтірілді. 

Көктемнен бері жалпы жұмыстың 30 проценті орындалды. Дегенмен бекітілген кестеден кешігіп жатқан компаниялар бар. Мердігерлермен жиын өткізген өңір басшысы жұмыс мерзіміне қатысты нақты тапсырмалар берді. 

Дастан Рыспеков, облыс әкімі:

- Өкінішке қарай, кейбір артта қалушылық бар. Енді сол қалған көлемді келесі жылы ертерек бастап, алдын ала бүкіл материалдарын дайындап, сол жұмыстарды тезірек жүргізу қажет. 

Жол жамылғысын төсеу жұмыстары келер жылы күн жылынғанда қайта жалғасады. Оған дейін қажетті материалдар қоры жасақталады. Жоба толықтай 2027 жылы аяқталады. 

Авторлары: Елдос Кәкенов, Гүлшаһира Серекбаева