Таразда 108 көшеге асфальт төселді

Тараз қаласында биыл 108 көшеге жаңа асфальт төселді, ал тағы үш негізгі көшеде жөндеу жұмыстары әлі де жалғасуда.

Нәтижесінде облыс орталығындағы жақсы және қанағаттанарлық жағдайдағы жолдардың үлесі 74,5%-ға жетті. Әсіресе тұрғындар тығыз орналасқан алқаптардың инфрақұрылымын дамытуға басымдық берілуде. Тараз әкімі жүргізіліп жатқан жөндеу және құрылыс жұмыстарының барысымен танысып, қала жолдарының сапасын арттыру мен қауіпсіздігін қамтамасыз ету мәселелері жіті назарда екенін жеткізді.

Бұған дейін Тектұрмастан облыс орталығына қарай жолға шыққан қала тұрғындары жол азабын тартып келген. Жылдар бойы жүргізушілер ойылып кеткен жолдармен жүруге мәжбүр болды. Тұрғын алабының өзінде де халық 15 жыл бойы көшелерге асфальт төсеуді, орталық су құбыры мен жарықтандыру жүйесін орнатуды, сондай-ақ қоғамдық көлік жүргізуді сұрап келген еді. Соңғы екі жылда ғана бұл мәселелер біржола шешімін тапты.

Мықтыбек Тәукебаев, Тараз қаласының тұрғыны:

- Осы Барысхан алқабындағы жолды жөндеді жақсылап. Жылдың басынан бастап қолға алып еді, міне, бітірді, жақсы рақмет.  

Бақытжан Орынбеков, Тараз қаласының әкімі:

- Тұрғындар тарапынан көтерілген мәселелер кезең-кезеңімен шешімін тапты. 100 пайыз ауызсу мен қамтамасыз етіп отырмыз, газ мәселесі толық шешімін тапты. Енді көше жарығының жұмыстары аяқталды, жақын арада көше жарығын қосамыз. Біз қазір бірінші кезекте суғару жүйесін тарту бойынша мәселені қарастырамыз. Одан кейін ағаш егу жұмыстарын бастаймыз.               

Жолдардың жаңарғаны «Барысхан» тұрғын алабының халқын айрықша қуанышқа бөлеп отыр. 24 көшеге жаңа асфальт төселіп, көше бойы жарықтандырылды. «Қарасай» алабында да дәл осындай жұмыстар атқарылды. Орталық су құбыры жүргізіліп, 11 көшеге асфальт төселді.

Нұрлан Олжабаев, «Жібек жолы» ауданы әкімінің м.а.:

- Шешілетін мәселелер алдымызда бар. Жергілікті тұрғындардың өтініштеріне сәйкес, балалар жаяу жүретін жол салу, көшелерді абаттандыру бойынша мәселелер бар, оны алдағы уақытта өзіміздің күшімізбен жоспарлап жатырмыз. 

Жалпы соңғы 3 жыл ішінде Таразда 420 көшеге асфальт төселген.

Серік-Ибраһим Орынбек, Тимур Сейілхан, Эльдар Байділда