Қызылордалық шебер темірден түйін түйеді

Қызылордада табиғаты нәзік болса да, темірден түйін түйген шебер бар. 36 жастағы Ғазиза Рысқұлова – ең жоғары санатты газ-электр дәнекерлеушісі. Елдегі ірі құрылыс жобаларында қолтаңбасы қалған білікті маман бұл салада 20 жылдан бері тер төгіп келеді. Жас буынға өзінің білгенін үйретуден де жалықпайды.

Күннің ыстық-суығын елемей темір пісіру асқан төзімділікті қажет етеді. Жауапкершілік жүгі ауыр дәл осы жұмысты Ғазиза Рысқұлова ұршықша иіреді. Металды отпен түйістіре отырып, иненің көзіндей саңылау қалдырмай жалғайтын шеберлігінің арқасында еліміздегі бірқатар ірі құрылыс жобаларына атсалысқан.  

Ғазизаның анасы – құрылысшы, әкесі – суретші. Сондықтан дәнекерлеуді жай кәсіп емес, нағыз өнер деп қабылдайды.

Ғазиза Рысқұлова, газ-электр дәнекерлеуші:

- Ойланбастан 9-сыныптан кейін мектептен құжаттарымды алып, Қызылорда қаласында осы дәнекерлеуші мамандығына түсіп кеттім. Бұл дәнекерлеуші деген бойға сіңді. Бұл да бір өнердің түрі. Өйткені шіте сондай бір талант болмаса, бұл дәнекерлеу мамандығын меңгеру оңай деп ойламаймын негізі. 

Газизаны бұл мамандыққа баулыған Қызылорда аграрлық-техникалық жоғары колледжінің оқытушысы Ниягүл Дәулетбаева. «Ол дәнекерлеуші мамандығын 36 жігітпен иық тіресіп жүріп, оқып шықты», - дейді ұстазы.

Ниягүл Дәулетбаева, Ғазизаның ұстазы:

- Мен оған: «Ғазиза, бұл мамандық қыздарға арналмаған. Бұның қиыншылығы өте көп, сондықтан мен сені оқытпаймын. Басқа, қыздар оқитын оператор ЭВМ, тігінші, повар деген, бухгалтер деген мамандықтар бар. Соған оқы», — дейтінмін. Ол: «жоқ, мен кетпеймін» деп отырып алды. Мен оны 20 күн журналға тіркемедім. Содан бұл қыздың осындай қайтпас қайсар, алғанынан қайтпайтын, өзінің дегеніне қол жеткізетін, сондай баланың қасиеті бар екенін байқадым. «Жарайды, онда сен осы 35 баланың старостасы боласың», — деп бұл қызды староста етіп сайлап қойдым.

Бүгінде тәжірибелі маман өзі де жастарға жол көрсетіп жүр. Болашақ әріптестерін кәсіби байқауларға дайындап, дәнекерлеу ісінің қыр-сырын үйретеді.

Елдар Әбілда, студент:

- Бұрыштық тегістегішті ұстау, дәнекерлеуді үйрену, электродты қалай қояды, қалай жұмыс істейді — соның бәрінен көктемде жарыс болады. Яғни маған Ғазиза апай дәнекерлеуді үйретуде. Құдай қаласа, бірінші орын аламын деген үміттемін. 

«Жұмыстың жеңілі жоқ. Алайда жүрекпен таңдаған мамандық қана шыңға жетелейді», - дейді Ғазиза.

Авторлары: Нұрлан Жақыпбеков, Ақан Әлиев