Қызылшаға байланысты дәрігерлер ата аналарға үндеу жасады

Астанадағы № 3 Көпсалалы қалалық балалар ауруханасында қызылша диагнозымен ауруханаға жатқызылған балаларға кезекті тексеру жүргізілді. Дәрігерлер ата-аналарға кезекті мәрте балаларына уақытылы вакцина салдырту керегін ескертті.

Аурухананың медициналық бөлім жөніндегі директор орынбасары Роза Өтегенованың айтуынша, 2025 жылдың қазан айынан бастап елордада қызылшамен ауыратын науқастар саны артқан.

— 2025 жылдың қазан айынан бері қызылша диагнозымен түсетін науқастар саны көбейді. Госпитализацияның ең жоғары көрсеткіші 2025 жылдың қараша-желтоқсан айларына сәйкес келді. Биылғы қаңтардан бастап төмендеу байқалғанымен, бұл диагнозбен балалар әлі де түсіп жатыр, — деді ол.

Қазіргі уақытта стационарда қызылша диагнозымен 50-ден астам бала ем қабылдап жатыр. Олардың басым бөлігі — бес жасқа дейінгі бүлдіршіндер. Сонымен қатар мектеп оқушылары мен орта және жоғары оқу орындарының студенттері де бар.

Екі жасар Асылымның анасы Бекзада Әміржанова қызының қалай ауырғанын айтып берді.

— Сәрсенбі күні қызымның қызуы көтерілді. Бұл қызылша болуы мүмкін деп ойлаған жоқпыз. Сенбі күні кешке қарай денесіне қатты бөртпе шыққан соң жедел жәрдем шақырдық. Дәрігерлер қызылша екенін айтты. Бізді бірден жұқпалы аурулар бөліміне жатқызды. Сол жерде қызылшаға қарсы екпе алған-алмағанымызды сұрады. Өкінішке қарай, қызыма да, төрт жасар ұлыма да екпе салдырған жоқпыз. Ауруханаға түскеннен кейін балаларыма екпе салдыртпағаныма қатты өкіндім, — деді ол.

Қызылша — вакцина арқылы алдын алуға болатын инфекция.

— Егер бала екпе алмаған болса, инфекция өте жұқпалы. Қызылша асқынуымен қауіпті — бронхит, әртүрлі деңгейдегі пневмония, басқа ағзалардың зақымдануы болуы мүмкін. Әсіресе орталық жүйке жүйесіне әсер ететін асқынулар өте қауіпті, — деп түсіндірді Роза Өтегенова.

Оның айтуынша, қызылша ауа-тамшы жолымен тарайды және науқаспен байланыс кезінде жұқтыру ықтималдығы өте жоғары.

Маманның сөзінше, қызылшаға қарсы алғашқы екпе балаларға бір жасында салынады. Бұл — қызылша, қызамық және паротитке қарсы біріктірілген вакцина. Қазіргі эпидемиологиялық жағдайға байланысты бас мемлекеттік санитариялық дәрігердің алты айлық жастан бастап балаларды қосымша иммундау туралы қаулысы күшінде.

— Өкінішке қарай, мұндай ерте жаста вакцина алғандардың үлесі әлі де төмен. Бұл ата-аналардың бала денсаулығына деген жауапкершілігін арттыру қажет екенін көрсетеді, — деді дәрігер.

Аурухана мамандары ата-аналарды вакцинацияны кейінге қалдырмай, балаларды қауіпті инфекциялардан уақытылы қорғауға шақырады. 

Айта кетелік Алматыдағы қызылшамен ауырғандардың басым бөлігі — екпе алмаған балалар екенін жазған едік.