Райымбектен Әл Фарабиге дейін Алматыда қоғамдық көліктің жаңа түрі іске қосылады

Алматыда Райымбек даңғылындағы BRT жобасының бір бөлігінен бас тарту туралы шешім қабылданды. Оның орнына қала билігі жаңа көлік түрін – SkyTrain жерүсті монорельсін іске қосуды жоспарлап отыр. Жаңа желі қай жерде салынатынын және BRT жобасының тағдыры қандай болатынын Tengrinews.kz тілшісі анықтап көрді.

Алматыда Райымбек даңғылындағы BRT жобасының бір бөлігінен бас тарту туралы шешім қабылданды. Оның орнына қала билігі жаңа көлік түрін – SkyTrain жерүсті монорельсін іске қосуды жоспарлап отыр. Жаңа желі қай жерде салынатынын және BRT жобасының тағдыры қандай болатынын Tengrinews.kz тілшісі анықтап көрді.

Алматыдағы SkyTrain

Алматы қаласының жол инфрақұрылымын дамыту басқармасы Райымбек даңғылындағы Өтеген батыр көшесінен Емцов көшесіне дейінгі аралықта орнатылған BRT элементтері бөлшектелетінін хабарлады.

"Бұл шешім бюджет қаражатын тиімді пайдалану қажеттілігіне байланысты қабылданды. Себебі Алматыда Райымбек даңғылының бойымен өтеді деп жоспарланған "SkyTrain" жобасын іске асыру көзделіп отыр", - деп мәлімдеді басқарма өкілдері.

Әкімдіктегілер SkyTrain жол үстімен өтетінін және жерүсті көлігімен арнайы бекеттер арқылы байланысатынын түсіндірді. Бұл жолға кететін уақытты қысқартуға мүмкіндік береді деп күтіледі.

"Бұл шешім жолаушылардың жерүсті көлік құралдары арқылы жылдам қатынауына мүмкіндік береді. Сонымен қатар оны қоғамдық көліктің басқа түрлерімен байланыстыруға болады. Нәтижесінде жол жүру уақыты қысқарып, Алматының көлік жүйесінің тиімділігі артады", – деп қосты ведомство өкілдері.

Сонымен қатар, Райымбек даңғылындағы автобустарға арналған арнайы жолақтардан бас тарту жоспарда жоқ. Әкімдік оларды даңғылдың бүкіл бойымен жол жиегіне орналастыру нұсқасын қарастырып жатыр.

SkyTrain деген не және оның бағыттары қандай болады?

SkyTrain - эстакадалар арқылы қозғалатын жоғары жылдамдықты монорельсті көлік. Пойыздардың орташа қозғалыс жылдамдығы сағатына 35 шақырым болады.

Алматы әкімдігі жалпы ұзындығы 42 шақырым болатын екі SkyTrain желісінің бағытын айқындады. Оларда 20 станция салынады, ал жүйені 36 ай (3 жыл) ішінде тұрғызу жоспарланған.

Бірінші желі (29 шақырым, 16 станция): "Барлық" көлік-транзиттік торабынан (КТТ) басталып, Райымбек даңғылымен жүреді, кейін Саин көшесіне бұрылып, Әл-Фараби даңғылы мен Шығыс айналма жолы арқылы "Шығыс қақпасы" КТТ-на дейін жалғасады. Екінші желі (13 шақырым, 4 станция): Райымбек даңғылының бойымен Саин көшесінен "Шығыс қақпасы" КТТ-на дейін тікелей өтеді.

SkyTrain депосын Алматы облысы Қарасай ауданындағы Абай ауылында, "Барлық" КТТ маңында салу жоспарланып отыр.

Құрылыс қашан басталады?

Қазіргі уақытта жоба бастапқы кезеңде тұр. Бұған дейін әкімдік жақын арада техникалық-экономикалық негіздеме (ТЭН) әзірлеу жоспарланғанын хабарлаған болатын. Онсыз желілердің бағытын, жобаның нақты құнын, қаржыландыру көздерін және іске асыру мерзімін анықтау мүмкін емес.

Тек жобаға көлік инфрақұрылымы саласында тәжірибесі бар халықаралық компанияларды тарту жоспарланып жатқаны ғана белгілі.

Билік неге қоғамдық көлікке басымдық беріп отыр?

Бұған дейін Алматы әкімінің орынбасары Алмасхан Сматлаев қала жолдарына түсетін салмақтың критикалық деңгейге жеткенін айтқан болатын.

Күн сайын көшелерде 1,1 миллионнан астам автомобиль қозғалады.

Бас жоспарға сәйкес, 2030 жылға қарай Алматы халқының саны 2,5 миллион адамға дейін өседі, ал автомобильдендіру деңгейі 1000 тұрғынға 311 машинадан келеді.

"Жолдарды кеңейту мен жолайрықтарын салу тек уақытша ғана нәтиже береді. Ұзақ мерзімді шешім - қоғамдық көлікті дамыту", - деген еді Сматлаев.

Ол қоғамдық көлік қаланың көлік жүйесін дамытудың негізгі бағытына айналатынын қадап айтты.

Бұл басқа елдерде қалай жұмыс істейді?

SkyTrain жүйесі әлемнің бірнеше елінде, мысалы, Канадада (Ванкувер) және Тайландта (Бангкок) белсенді қолданылады.

Канада, Ванкувер

Ванкувердегі SkyTrain жүйесі 1986 жылдан бері жұмыс істейді және әлемдегі алғашқы толық автоматтандырылған көлік жүйелерінің бірі болып саналады. Ол Expo Line, Millennium Line және Canada Line атты үш желіні қамтиды, ондағы пойыздар машинистсіз қатынайды.

Жол жүру құны:

1 аймақ - шамамен 3,35 доллар; 2 аймақ - 4,85 доллар; 3 аймақ - 6,60 доллар. Тайланд, Бангкок

Бангкокта BTS Skytrain жүйесі шамамен 68,5 шақырымды қамтиды және 60 станциядан тұрады. Пойыздар жол үстімен қозғалады, бұл кептелістерден қашуға мүмкіндік береді.

Жол жүру құны:

17 баттан (шамамен 250 теңге) 59 батқа (шамамен 870 теңге) дейін.

Еске салайық, 2026 жылдың наурызында Президент Қасым-Жомарт Тоқаев Алматы әкімі Дархан Сатыбалдыны қабылдаған болатын. Кездесу қорытындысы бойынша Мемлекет басшысы бірқатар тапсырма берді. Оның ішінде Almaty AI Park жобасын жедел іске қосу, сондай-ақ LRT мен SkyTrain жүйелерін құру жұмыстарын қарқындату тапсырмасы да бар.

2026 жылдың маусымында Қасым-Жомарт Тоқаев Алатау қаласын дамыту мәселелері жөніндегі кеңесте сөз сөйледі. Жиын барысында Алматы агломерациясы ішіндегі көлік байланысын нығайту және жүрдек қоғамдық көлікті белсенді дамыту қажет екені айтылды.

Президент Алматы қаласы мен Алматы облысының әкімдеріне "Самұрық-Қазына" қорымен бірлесіп, 1 тамызға дейін Skytrain желілерін салу жобасын, сондай-ақ Алатау мен Алматыны байланыстыратын жүрдек қоғамдық көлікті дамыту мәселесін пысықтауды тапсырды.

Tengrinews.kz Алматының қоғамдық көлік жүйесіндегі өзгерістерді бақылап отырады.

Google News арқылы жаңалықтарымызды қадағалаңыз

Жазылу