Рейдтер жалғасуда: Атырауда шетелдік нөмірлі көліктердің иелері тағы жиналды

Атырауда полицияның күшейтілген тексерістері қайта басталғаннан кейін шетелдік тіркеудегі көлік иелері тағы да жинала бастады. 

Таңертеңнен бері тәртіп сақшылары құжаттарды, сақтандыруды, көлік тіркеуін, сондай-ақ дәрі қобдишасы, өрт сөндіргіш пен апаттық белгі бар-жоғын тексеріп жатыр.

Жүргізушілердің айтуынша, басты назар армян, грузин және ресейлік нөмірлі көліктерге аударылуда. Көпшілік айыппұлдардан, көліктердің айыптұраққа қойылуынан және құжат рәсімдеудегі қиындықтардан қауіптенеді.

Қаладағы тұрақтар мен сауда орындары маңында ондаған көлік иелері жиналып, жағдайды талқылап жатыр. Әлеуметтік желілер мен чаттарда тексеріс орындарынан түсірілген бейнематериалдар таралуда.

Кейбір жүргізушілер тексерістердің аяқ астынан басталғанын айтады: 

— Біз заңға қарсы емеспіз, бірақ адамдарды дайындықсыз қалдырды. Көпшілігі талаптар мен құжаттарды реттеуге үлгермей жатыр, — дейді жиналғандар.

Бұған дейін де Атырауда қосымша полиция күштері келгеннен кейін осындай жиналыстар өткен болатын. Ол кезде рейдтер үлкен резонанс туғызған еді.

Жүргізушілердің бағалауынша, қалада мыңдаған шетелдік нөмірлі көлік бар, олардың басым бөлігі Грузия мен Арменияда тіркелген. 

Қала тұрғындары әлеуметтік желілерде белсенділік танытып, көшелерден түсірілген бейнелерді жариялауды жалғастыруда. Кадрларда күшейтілген патрульдеу мен тексеруге тоқтатылған көліктердің көптігі анық көрінеді.  

Айгүл МАНСУРОВА

Бүгін, 14:14