Атырауда пиротехникаға қатысты рейдтер заң бұзушылықтарды анықтады

Атырауда жаңа жыл қарсаңында «Пиротехника» атты жедел-профилактикалық іс-шара өтіп жатыр. 

Полиция қызметкерлері пиротехникалық бұйымдарды әкелу, сақтау, сату және қолдану барысына бақылауды күшейтті. Мақсат – мереке күндері жарақат алу мен өрттің алдын алу.

Қалалық полиция басқармасының инспекторы Арон Кенжебекұлының айтуынша, операция екі кезеңнен тұрады және 3 қаңтарда аяқталады. Бірінші кезең (5–12 желтоқсан) халықпен түсіндіру жұмыстарын жүргізуге арналса, екінші кезең (20 желтоқсаннан бастап) нақты заң бұзушылықтарды анықтауға бағытталған.

Рейд барысында қала аумағында 13 құқық бұзушылық фактісі тіркеліп, барлық азаматтар әкімшілік жауапкершілікке тартылды.

Құтқарушылар қыс мезгілінде өрт қаупінің жоғары екенін еске салды. Биыл Атырау облысында шамамен 300 өрт оқиғасы тіркелген. Оның жартысынан астамы тұрғын үйлерде болған. 9 адам қаза тауып, 16 адам күйік алған. Отын маусымы басталғалы 30 өрт тіркеліп, бір оқиға адам өлімімен аяқталған.

Қалалық төтенше жағдайлар басқармасы басшысының орынбасары Сәбит Борашев мереке күндері қауіпсіздік шаралары күшейтілетінін атап өтті. Ол тұрғындарды пиротехника, шырша, гирлянда және бенгал шамдарын қолданғанда ережелерді қатаң сақтауға шақырды. Өрт шыққан жағдайда 101 немесе 112 нөміріне хабарлау қажет.

Мамандар тек лицензиясы бар ұйымдардан алынған пиротехниканы қолдануға кеңес береді. Қазіргі уақытта Атырау облысында ресми түрде пиротехника сатуға рұқсат алған екі компания бар – «Пиротэкс-Атырау» ЖШС және «Батыс Сервис Компания» ЖШС.

Бүгін, 16:21