Ресей, Украина және АҚШ тұтқын алмасу жөнінде келісімге келді Уиткофф

АСТАНА, 5 ақпан – Sputnik. Мәскеу, Киев және Вашингтон Абу-Дабиде өткен кездесуде 314 әскери тұтқынды алмасу туралы келісімге келді. Бұл туралы АҚШ президентінің арнайы елшісі Стивен Уиткофф X әлеуметтік желісінде мәлімдеді.

"Бүгін делегациялар кейінгі бес айда алғаш рет осындай келісімге қол жеткізді. Бұл нәтиже жан-жақты әрі нәтижелі өткен бейбіт келіссөздің арқасында мүмкін болды", – деп жазды ол.

Уиткоффтың айтуынша, тараптарды әлі де ауқымды жұмыс күтіп тұр, алайда қол жеткізілген келісім дипломатияның нақты нәтиже беретінін көрсетіп отыр.

"Алдағы апталарда қосымша прогресс болады деп болжануда", – деп толықтырды ол.

Кеше БАӘ-де Мәскеу, Вашингтон және Киев өкілдерінің қатысуымен келіссөздің екінші кезеңі басталған еді. Украина Ұлттық қауіпсіздік және қорғаныс кеңесінің хатшысы Рустем Умеров кездесуді мазмұнды әрі нәтижелі деп атады.

Бүгін делегациялар жұмысты жалғастырды. Келіссөздер жабық форматта өтіп жатыр. Кездесу қорытындысы бойынша ресми мәлімдеме жасалады деп жоспарланған.