Ресейде Telegram ды толық бұғаттау мәселесі талқылануда

Ресейлік БАҚ-та 1 сәуірден бастап Telegram мессенджері ел аумағында толық тоқтатылатыны туралы ақпарат тарады. 

Бұл туралы Euronews Baza арнасына сілтеме жасап хабарлады. Онда қосымшаның мобильді және стационарлық интернет арқылы мүлде ашылмайтыны айтылған.

Алайда ресми органдар бұл деректі «шала ақпарат» деп атағанымен, нақты түрде жоққа шығарған жоқ. Көптеген ресейліктер мұны интернет цензурасының күшеюі мен цифрлық оқшаулаудың белгісі ретінде қабылдады.

Telegram-ды шектеу шаралары 2025 жылдың жазынан бері жалғасып келеді. Роскомнадзор мессенджерді заң бұзды, тыйым салынған контент жариялады және шетелдік арнайы қызметтерге алаң ашты деп айыптайды. Ведомство серверлерді Ресейде орналастыруды талап еткен.

Telegram негізін қалаушы Павел Дуров бұл әрекеттерді сынға алып, билік азаматтарды бақылауға арналған мемлекеттік мессенджер Max-қа көшіруге тырысуда деп мәлімдеді. Бұл қосымша пайдаланушылардың деректерін жинап, кез келген мемлекеттік органға беруге құқылы.

Мессенджерді бұғаттау ықтималдығы қоғамда үлкен резонанс туғызды. Кремльге жақын блогерлер мен журналистер де наразылық білдіріп, Telegram-сыз аудиториямен байланыс әлсірейтінін айтты. Әскери ортада да алаңдаушылық бар: Украинадағы соғыс кезінде негізгі байланыс құралы Telegram болып келген.

Қазіргі таңда ресми шешім қабылданған жоқ, бірақ сарапшылар толық бұғаттауды уақыт мәселесі деп санайды. Ресейде Facebook, Instagram, Signal, WhatsApp, Snapchat және FaceTime бұрыннан шектелген. Telegram-ды қолданушылар VPN арқылы пайдалануды жалғастыруы мүмкін.

Бүгін, 12:22