Telegram ды бұғаттау ресейлік төлем жүйесінде проблемалар туғызды

Reuters хабарламасына сүйенген Aikyn.kz танымал мессенджерге Ресейде тыйым салу мен ұлттық төлем жүйесіндегі ақаудың арасындағы байланысты бағалайды.

Павел Дуровтың айтуынша, төлем жүйесіндегі ақау VPN желілеріне жасалған шабуылмен байланысты болған. Ол ресейліктер енді «цифрлық қарсылыққа» қосылып жатқанын мәлімдеді.

Ресей Telegram-ды қауіпсіздік себептерін алға тартып бұғаттаған. Telegram негізін қалаушы, миллиардер Павел Дуров сенбі күні (4 сәуір) Ресейдің виртуалды жеке желілерді (VPN) бұғаттау әрекеті ұлттық төлем жүйесінде проблема туғызғанын жазды. Миллиардер ондаған миллион ресейлік цифрлық бақылауға қарсы шығып жатқанын мәлімдеді.

Ресей бірнеше рет мобильді интернетті бұғаттап, бұқаралық коммуникация құралдарын өшіруге кең өкілеттік берді. Сондай-ақ мессенджерлер мен VPN-сервистерді өшіргізді.

Нақты себебін Ресей әлі толық түсіндірмеген жұмада (3 сәуір) болған техникалық ақаулық азаматтар арасында бейберекеттік туғызды. Мәскеу метросы турникеттерден жолаушыларды тегін өткізген, кейбір аймақтық хайуанаттар бағы келушілерді қолма-қол ақшамен төлем жасауды сұраған.

«Цифрлық Қарсылыққа қайта қош келдіңдер, менің ресейлік бауырларым мен апа-әпкелерім. Бүкіл ел осы ақылға қонбайтын шектеулерді айналып өту үшін жұмылдырылып жатыр», – деп жазды Дуров Telegram-да.

Ресейдегі ең ірі банкі Сбербанк жұмада техникалық мәселе туындағанын мойындаған. Кейбір ресейлік БАҚ бұл ақау мемлекеттің белгілі бір сайттар мен VPN-сервистерді бұғаттау әрекеттерінен болғаны туралы материалдарын кейін өшіріп тастады.

Ресей шенеуніктері VPN-сервистер мен WhatsApp және Telegram секілді мессенджерлерге бақылауды күшейту қауіпсіздік үшін қажет деп мәлімдейді. Олардың айтуынша, бұған Украина тарапынан Ресей аумағының ішкі бөлігіне жасалған шабуылдар мен Батыс барлау қызметтерінің ықтимал диверсиялық әрекеттері себеп болған.

Ресей 1 миллиардтан астам белсенді қолданушысы бар және Украинада кең қолданылатын Telegram жұмысын баяулатқан болатын. Сондай-ақ Дуровқа қатысты терроризм айыбы бойынша тергеу жүргізуде.

Кремль Telegram-ды Украина мен НАТО елдерінің барлау қызметтері бұзды, соның салдарынан ресейлік сарбаздар қаза тапты деп мәлімдеген. Telegram болса бұл айыптауларды жоққа шығарып, Мәскеу ресейліктерді мемлекет қолдайтын MAX мессенджеріне ауысуға мәжбүрлеуде дейді. Бұл мессенджер мектептер мен университеттерге пайдалануға ұсынылған.

Reuters жұмада (3 сәуір) хабарлағандай, Кремльдің осындай ұлттық мессенджер жасауға ұмтылысы кейбір ресейліктер арасында наразылық туғызған.