Ресейде туған : Олимпиада чемпионы Михаил Шайдоровтың сүйіктісінің кім екені мәлім болды (ФОТО)

Әлеуметтік желіде мәнерлеп сырғанаудан Олимпиада чемпионы Михаил Шайдоровтың жеке өмірі қызу талқыланып жатыр. Әсіресе спортшының сүйіктісіне қатысты ақпарат көпшіліктің қызығушылығын оятты, деп жазады 1bol.kz.

Instagram желісіндегі taby.nu парақшасының мәліметінше, Шайдоровтың жүрегін жаулаған ару – Айсұлу Мырзағалиева. Ол – көркем гимнастикадан Азия чемпионы, ұлттық құраманың белді спортшыларының бірі.

Айсұлу спорт әлемінде бұрыннан танымал. Еңбекқорлығы мен табандылығының арқасында халықаралық жарыстарда жоғары нәтижелер көрсетіп келеді. Болашақ чемпион Ресейдің Сочи қаласында дүниеге келген. Тоғыз жасынан бастап көркем гимнастикамен айналысып, жасөспірім кезінде-ақ Ресей аумағындағы түрлі турнирлерде жүлде алған.

2015 жылы Айсұлу Алматыға келіп, қаланың ашық біріншілігінде жеңімпаз атанды. Дәл осы жарыста оның өнері қазақстандық бапкерлердің назарын аударып, оған Қазақстан атынан өнер көрсету ұсынылған. Ол бұл мүмкіндікті қабыл алып, сол жылы Астанаға қоныс аударды. Елордадағы «Жұлдыз» спорт мектебінде жаттығып, Әлем кубогы кезеңдерінде бір күміс және төрт қола медаль иеленді. Сонымен қатар Азия чемпионатында алтын жүлде жеңіп алды.

Айта кетейік, Олимпиадада тарихи жеңіске жеткен сәтте Айсұлу Мырзағалиева Михаил Шайдоровты алғашқылардың бірі болып құттықтады. Ол әлеуметтік желіде:

«Менің Олимпиада чемпионым! Өзі бәрінен тәтті», – деп жазба қалдырған.