Ресейге жаңа ережелер бойынша сапарлау қазақстандықтар үшін не өзгерді

2026 жылғы 1 шілдеден бастап Ресейде Қазақстан азаматтарына да қатысты жаңа көші-қон ережелері күшіне енді. Өзгерістердің бір бөлігі жұмысқа немесе оқуға келетіндерге қатысты болса, қалғандары мемлекеттік баж салығына, болу мерзіміне және көші-қон процедураларының келесі кезеңдеріне байланысты. Жаңа нормалар туралы Еуразиялық экономикалық комиссия (ЕЭК) хабарлады, деп жазады Tengri Travel.

2026 жылғы 1 шілдеден бастап Ресейде Қазақстан азаматтарына да қатысты жаңа көші-қон ережелері күшіне енді. Өзгерістердің бір бөлігі жұмысқа немесе оқуға келетіндерге қатысты болса, қалғандары мемлекеттік баж салығына, болу мерзіміне және көші-қон процедураларының келесі кезеңдеріне байланысты. Жаңа нормалар туралы Еуразиялық экономикалық комиссия (ЕЭК) хабарлады, деп жазады Tengri Travel.

Жұмыс істейтіндер мен студенттер үшін ruID қолдану ережелері өзгерді

Негізгі өзгерістердің бірі Ресейге жұмыс істеу немесе оқу үшін кіретіндерге қатысты.

Егер бұрын ruID мобильді қосымшасын пайдалану эксперимент аясында ерікті болса, 1 шілдеден бастап шетелдіктердің бұл санаты үшін ол міндетті болып саналады. Бұған дейін Қазақстанның Сыртқы істер министрлігі сапар алдында қосымшада профиль жасап, елге кіру туралы электронды өтініш беру қажет екенін хабарлады.

Бұл рәсімді шекарадан өтуге дейін 72 сағаттан кешіктірмей жасау керек. Өтініш қаралғаннан кейін қосымшада дербес QR-код жасалады.

"Аталған QR-код өтініш берілген сәттен бастап 90 күн бойы жарамды болады", - деп хабарлады ҚР СІМ.

ЕЭК-те түсіндіруінше, енді көші-қон саласында мемлекеттік қызмет көрсету кезінде елге кіру мақсаты туралы мәліметтер шетел азаматының қосымша арқылы берген өтінішінде көрсетілген ақпаратпен расталады.

Сонымен қатар Ресейге туристік, жеке немесе басқа да мақсаттармен баратын қазақстандықтар үшін визасыз режим сақталады.

Цифрлық кіру бойынша эксперимент мерзімі ұзартылды

Сонымен қатар, Ресей визасыз елдерден келген шетелдік азаматтарға ruID қосымшасын пайдаланып елге кіруге рұқсат беру экспериментін кеңейтті.

Оның көмегімен пайдаланушылар цифрлық мемлекеттік қызметтерге қол жеткізе алады, ресейлік сервистер арқылы қаржылық операциялар жүргізіп, жергілікті байланыс операторларына қосыла алады. Қосымшаны App Store, Google Play және AppGallery дүкендерінен жүктеп алуға болады.

ЕЭК мәліметінше, эксперимент 2027 жылғы 31 желтоқсанға дейін жалғасады.

"Шетел азаматтарының Ресей Федерациясына "ruID" мобильді қосымшасы арқылы визасыз тәртіппен кіруінің жаңа ережелері мен шарттарын апробациялау бойынша эксперимент 2027 жылғы 31 желтоқсанға дейін ұзартылады", - делінген комиссия хабарламасында.

Бұған дейін эксперименттің өзі Қазақстан мен Ресей арасындағы визасыз режимді жоймайтыны хабарланды. Жаңа міндетті талаптар қолданылмайтын тұлғалар үшін қосымшада өтініштің болмауы елге кіруден бас тартуға негіз болмайды.

Халықаралық тасымал жүргізушілері үшін өтініш беру тәртібі жеңілдетілді

Тағы бір өзгеріс халықаралық тасымалдарды орындайтын жүргізушілерге қатысты.

Енді олар Ресейде уақытша болу мерзімін күнтізбелік жыл ішінде жиынтығы 180 күнге дейін ұзарту туралы өтінішті ruID қосымшасы арқылы бере алады.

Бұл үшін Ресей үкіметінің қаулысында қарастырылған құжаттарды қоса беру қажет.

Мемлекеттік баж мөлшері өсті

1 шілдеден бастап көші-қон саласындағы мемлекеттік баждардың жаңа мөлшерлемелері де күшіне енді.

ЕЭК деректері бойынша:

Ресей азаматтығын алу үшін мемлекеттік баж 4,2 мыңнан (шамамен 25 мың теңге) 50 мың рубльге дейін (шамамен 308,5 мың теңге) өсті; тұруға ықтиярхат (ВНЖ) беру үшін - 6 мыңнан (шамамен 37 мың теңге) 30 мың рубльге дейін (шамамен 185 мың теңге); уақытша тұруға рұқсат (РВП) алу үшін - 1,9 мыңнан (шамамен 11 мың теңге) 15 мың рубльге дейін (шамамен 92,5 мың теңге).

Бұл өзгерістер Ресейде тиісті құжаттарды рәсімдейтін шетел азаматтарына қатысты.

Күзде медициналық тексеру мерзімдері өзгереді

Тағы бір жаңалық сәл кейінірек күшіне енеді.

2026 жылғы 1 қыркүйектен бастап шетел азаматтарының жекелеген санаттары үшін медициналық тексеруден өтудің жаңа ережелері енгізіледі.

ЕЭК хабарлағандай, бұл процедурадан өту мерзімі 30 күнге дейін қысқартылады.

Комиссия Ресей ведомстволарымен бірлесіп қосымша ақпараттық-анықтамалық материалдар дайындалып жатқанын, олар ЕЭК ресми сайтында жарияланатынын атап өтті.

Қазақстандықтар нені білуі маңызды?

Өзгерістерге қарамастан, Қазақстан мен Ресей арасындағы визасыз режим сақталады.

Қазақстан азаматтары бұрынғысынша Ресейге визасыз кіріп, әр 180 күн ішінде 90 күнге дейін елде бола алады, егер келу мақсаты мен қолданыстағы көші-қон ережелерінде өзгеше көзделмесе.

Сапарға шығу үшін шетелдік паспортты да, жеке куәлікті де пайдалануға болады. Егер елге кіру паспорт арқылы жүзеге асырылса, оның қолданылу мерзімі сапар кезеңін толық қамтуы тиіс.

Елде 30 күнтізбелік күнге дейін болған жағдайда тұрғылықты жері бойынша тіркелу талап етілмейді. Егер мерзім 30 күннен асса (бірақ 90 күннен аспауы тиіс), Ресей ІІМ-нің аумақтық органдарында көші-қон есебіне тұру қажет.

Сонымен қатар 2025 жылдың желтоқсанынан бастап қазақстандықтар үшін Ресейге кіру кезінде биометриядан өту міндетті болды, ал бұған дейін келушінің цифрлық профилі және ruID қосымшасын пайдаланумен байланысты басқа да рәсімдер енгізілген болатын.

Тағы оқыңыз: 2026 жылы қазақстандықтар паспортсыз қайда бара алады?

Google News арқылы жаңалықтарымызды қадағалаңыз

Жазылу