Ресейлік блогер Солтүстік Қазақстанда тағы да ағаш отырғызуға көмектеседі

Солтүстік Қазақстан облысында сәуір айында Петропавл маңында экологиялық акция өтеді. Оған волонтерлер, экоактивистер және ресейлік блогер Алексей Сибирский қатысады. 

Бұл өңірде ұйымдастырылып отырған екінші ауқымды шара болмақ, деп хабарлайды Qazaqstan Media.

Қоғам белсендісі Динара Өмірзақованың айтуынша, Сибирский бастаманың басты демеушісі ретінде көшеттерді сатып алып, топырақ дайындау шығындарын жабуда. Өткен жылы Мещан орманында өткен алғашқы акцияда жүздеген қатысушы 15 мыңнан астам көшет отырғызған еді.

Алексей Сибирский — ТМД кеңістігінде танымал экоблогер, оның әлеуметтік желідегі аудиториясы миллиондаған адамды қамтиды. Ол Ресейде ішінара мобилизация жарияланғаннан кейін отбасымен бірге Орал қаласына көшіп келіп, жергілікті экологиялық бастамаларға белсенді араласа бастаған.

Бұл шара аймақтағы орман көлемін арттыруға бағытталған кең ауқымды бағдарлама аясында өтуде. Солтүстік Қазақстан облысының ормандылығы 5,5%-ды құрайды, ал облыс әкімдігінің қарамағында 550 мың гектар орман қоры бар. 2027 жылға дейін орманды қалпына келтірудің кешенді жоспары жүзеге асырылып келеді.

Бүгін, 15:42