Ресейліктер Қазақстанға жанармай туризміне жаппай ағыла бастады

Ресейдегі жанармай тапшылығы мен бағаның өсуіне байланысты ресейліктер Қазақстанға жиі келіп, бензин құйып жүр. Бұл туралы NewTimes.kz хабарлады.

Басылым дерегіне сүйенсек, Ресейдің бірқатар аймақтарында бензин мен дизель тапшылығы байқалып, АЖС-тарда кезектер көбейген әрі баға өскен. Әсіресе оңтүстік өңірлерде, Сібірде және Қытай бағытына жақын аймақтарда жағдай күрделі.

Мәселе тек қарапайым жүргізушілерді ғана емес, автотасымал нарығын да қамтыды. Ресейлік компаниялар 1 шілдеден бастап тарифтерді кемінде 10%-ға көтеретінін ескерткен. Кей бағыттарда дизель бағасы литріне 70–72 рубльден 77–90 рубльге дейін қымбаттаған.

Осыған байланысты кейбір тасымалдаушылар балама жолдарды іздей бастады. Бірқатар компаниялар рейстерін Қазақстан арқылы жүргізіп отыр. Нарық қатысушыларының айтуынша, Қазақстанда жанармай жеткілікті әрі бағасы Ресейге қарағанда төмен.

Талдықорғандық автосарапшы Әділ Бейсенбаевтың айтуынша, Ресейдің шекара маңындағы тұрғындары Қазақстандағы АЖС-тарға жиі келе бастаған. Ол мысал ретінде Самарадан арнайы Уральскіге барып, көлігін жанармаймен толтырған жүргізушіні келтірді.

Ресейлік жүргізушінің сөзінше, Қазақстандағы бензин өз еліндегіден екі есе арзан. Қосымша артықшылық ретінде ол кезектің жоқтығын және АЖС маңында рубльді теңгеге айырбастау мүмкіндігін атады.

Ресейдегі жағдайға байланысты жаңа құбылыс – «жанармай туризмі» туралы айтыла бастады. Егер жанармай тапшылығы жалғаса берсе, ресейлік жүргізушілердің Қазақстандағы АЖС-тарға ағылатын легі артуы мүмкін.

Қазақстан үшін бұл жағдай шекара маңындағы жанармай бекеттеріне қосымша салмақ түсіруі ықтимал, әсіресе жанармаймен қамтамасыз ету мәселелері уақытша туындайтын өңірлерде.

Бұған дейін Reuters дереккөздері Ресейдің Қазақстанмен Аи-92 маркалы бензинді импорттау жөнінде келіссөздер жүргізіп жатқанын хабарлаған. Агенттіктің мәліметінше, көлем шамамен 50 мың тонна болуы мүмкін.

Бүгін, 14:47