Ресеймен диалог жасайтын маман табылмай отыр еуродепутат

АСТАНА, 8 сәуір – Sputnik. Еуропалық Одақтың сыртқы істер министрлері Ресеймен диалог қайта жанданған жағдайда ЕО мүддесін қорғайтын ортақ кандидат бойынша келісімге келе алмай отыр. Бұған олардың арасындағы бәсекелестік пен өзара сенімнің жоқтығы себеп, деді еуродепутат Фернан Картайзер Мәскеуде.

"Біздің министрлер Ресей Федерациясымен диалогты қалпына келтіру үшін өзара келісімге келе алмай отыр. Негізінде екі басты мәселе бар. Біріншісі – Еуропалық одақ өкілі кім болады деген сұрақ. Олар бәрі бірдей сенетін кандидатты таба алмай отыр. Меніңше, олар ЕО Кеңесіне төрағалық ететін елдің премьер-министрін таңдаса дұрыс болар еді. Қазіргі жағдайда – Кипр. Бұл қарапайым шешім болмақ. Бірақ шын мәнінде министрлер арасында бәсекелестік, сенімсіздік және тағы басқа мәселелер көп", - деп мәлімдеді ол X әлеуметтік желісінде Мәскеуге сапары барысында.

Картайзердің айтуынша, екінші мәселе – ықтимал өкілдің мандатына байланысты. Себебі еуропалықтар айтып отырған жалғыз нәрсе – Украинаға қолдауды жалғастыру немесе АҚШ айтқанды қайталау керек.

"Еуропаның мәселесі – бізде саясат жоқ, бастама жоқ, келіссөз жоқ, қазіргі таңда Украина айналасындағы қақтығысқа ұсына алатын идеяымыз жоқ. Бұл өте өкінішті. Біз жоқ сияқтымыз. Алдағы күндердегі менің миссиям өте айқын. Батыс елдеріндегі әріптестеріммен бірге біз өзіміздің бар екенімізді қайта көрсеткіміз келеді. Мен ресейліктерге Батыста да шешім іздейтін және Ресей Федерациясымен диалогты қолдайтын адамдар бар екенін еске салғым келеді", - деп толықтырды ол.

Бұған дейін Эммануэль Макрон бірнеше еуропалық әріптестеріне Ресеймен диалогты қайта жандандыруды ұсынғанын мәлімдеген болатын.