​РФ мен Украина қаза тапқан әскери қызметкерлердің мәйіттерімен алмасты

15 мамыр күні Ресей мен Украина қаза тапқан әскери қызметкерлердің денелерін алмастыру рәсімін жүргізді, деп хабарлайды АА. 

Ресейлік ақпарат құралдарының хабарлауынша, Мәскеу Украинаға 526 украин жауынгерінің мәйітін беріп, Киевтен 41 ресейлік әскери қызметкердің денесін алды.

Алдыңғы осындай алмастыру 9 сәуірде өткен болатын. Ол кезде Ресей Украинаға 1000 мәйітті қайтарып, 41 ресейлік әскери қызметкердің денесін алған еді.

Ресей президентінің көмекшісі әрі келіссөздер тобының жетекшісі Владимир Мединский бұл көрсеткішті «шығындар арақатынасының көрінісі» деп атады.

Сол күні тараптар тұтқындармен де алмасты: «205-ке 205» формуласы бойынша екі жақтан да 205 әскери үйіне оралды. Украина президенті Владимир Зеленский бұл келісімді «1000-ға 1000» көлеміндегі алғашқы кезең» деп сипаттады.

Ресей Қорғаныс министрлігі де ақпаратты растады: 15 мамырда Киев бақылауындағы аумақтан 205 ресейлік әскери қайтарылып, Украинаға 205 тұтқын берілген.

Бүгін, 18:40