Садыр Жапаров Қамшыбек Тәшиевтің сыныптасын да қызметінен босатты

Қырғызстанда Экономика және коммерция министрлігіне қарасты Монополияға қарсы реттеу қызметінің төрағасы ауысты. Бұған дейін бұл лауазымды бұрынғы ҰҚМК төрағасы Қамшыбек Тәшиевтің сыныптасы Жеңалы Орозбаев атқарған еді, деп Arasha.kz тілшісі Kaktus.media-ға сілтеме жасап хабарлайды.

Ведомствоның жаңа басшысы болып Айбек Мамыралиев тағайындалды. Ол ресми түрде ұжымға таныстырылған.

Сонымен қатар қырғыз БАҚ-ы Қамшыбек Тәшиевтің жақтастарының бірі саналған Нұрғазы Анарқұловтың ұсталғанын жазды. Ол Қазақстанмен шекарадағы бақылау бекетінде қолға түскен. Кей ақпараттарға сәйкес, Анарқұлов Қырғызстанда президенттің кезектен тыс сайлауын өткізуді қолдауға шақырған.

Басылымдардың мәліметінше, Анарқұловтың үйінде тінту жүргізіліп, кейін ол Бішкек қалалық ІІБ-нің уақытша ұстау изоляторына қамалған.

Еске сала кетейік, 10 ақпанда Қамшыбек Тәшиев Қырғызстан Министрлер кабинетінің төраға орынбасары әрі Ұлттық қауіпсіздік мемлекеттік комитетінің төрағасы қызметінен босатылған болатын. Тиісті жарлыққа ел президенті Садыр Жапаров қол қойған.

Президенттің баспасөз қызметі бұл шешімнің басты мақсаты – мемлекеттің бірлігін сақтау және қоғамда, соның ішінде мемлекеттік құрылымдар арасында жікке бөлінуге жол бермеу екенін мәлімдеді.

Алайда кейін президенттің баспасөз хатшысы туындаған шиеленіске Тәшиевтің өзі емес, оның жақын айналасындағы адамдар себеп болғанын айтты. Олар депутаттарға хабарласып, «генералды қолдауға» және «президенттің жаңа сайлауын бастамалауға» үгіттегені хабарланған.