Сайлау учаскесінен қандай әрекет үшін шығарып жіберуі мүмкін ОСК түсініктемесі

АСТАНА, 18 тамыз – Sputnik. Орталық сайлау комиссиясы дауыс беру учаскесінен сайлаушыны шығару тәртібін түсіндірді, деп хабарлайды Sputnik Қазақстан тілшісі.

Комиссия мүшесі Азамат Айманақұмовтың айтуынша, әрбір учаске төрағасы дауыс беруге келген азаматтардың тәртібін бақылап отырады.

"Төраға Қазақстан Республикасының сайлау туралы конституциялық заң талаптарын бұзып, дауыс беруге кедергі келтірген кез келген адамнан учаскеден кетуді талап етуге құқылы. Дауыс беру күні дауыс беруге арналған үй-жайда сайлау процесіне қатысы жоқ адамдардың болуына да тыйым салынады", - деді Айманақұмов комиссияның бүгінгі отырысында.

Заң талаптарын бұзған байқаушылар және басқа да адамдар комиссияның жазбаша шешімі негізінде сайлау учаскесінен шығарылады.

Жарамсыз бюллетеньдер

Заң бойынша дауыс беру кезінде кейбір бюллетеньдер жарамсыз деп танылуы мүмкін. Олар:

қарындашпен белгі қойылған бюллетень;

белгі қойылмаған бюллетень;

комиссия мүшесі қол қоймаған бюллетень;

бір саяси партиядан артық белгі қойылған бюллетень;

түзетулер немесе басқа да бұрмалау іздері бар бюллетень;

сайлаушының таңдауын анықтау мүмкін емес бюллетень.