“Шошытарлық және әдепсіз“: жолаушыларды қандай киімі үшін рейстен шығарып жіберуі мүмкін

Көпшілік ұшақпен сапарлағанда барынша ыңғайлы киім киюге үйренген. Бірақ сыртқы келбет бортқа жібермеуге себеп болуы мүмкін бе? Tengri Travel "Қазақстанда жолаушылар үшін дресс-код ережелері бар ма және киімге байланысты ұшаққа кіргізуден бас тартуы мүмкін бе?" деген сұрақтарға жауап іздеп көрді.

Көпшілік ұшақпен сапарлағанда барынша ыңғайлы киім киюге үйренген. Бірақ сыртқы келбет бортқа жібермеуге себеп болуы мүмкін бе? Tengri Travel "Қазақстанда жолаушылар үшін дресс-код ережелері бар ма және киімге байланысты ұшаққа кіргізуден бас тартуы мүмкін бе?" деген сұрақтарға жауап іздеп көрді.

Қазақстанда дресс-код бар ма?

Азаматтық авиация комитеті мәліметінше, Қазақстанда жолаушылардың сыртқы келбетіне қатысты ресми талаптар жоқ.

"Қолданыстағы заңнамаға сәйкес, әуе рейсіне отырғызу кезінде жолаушылардың сыртқы келбетіне немесе киіміне қатысты ресми талаптар белгіленбеген", - деді комитет өкілдері.

Бұл ақпаратты Scat әуекомпаниясы да растады.

"Әуекомпания жолаушылар үшін бөлек дресс-код белгілемейді. Рейске отырғызу кезінде тасымалдау ережелерін, авиациялық қауіпсіздік талаптары мен қоғамдық тәртіп нормаларын сақтау шешуші мәнге ие", - деп түсіндірді әуе тасымалдаушының баспасөз қызметі.

Басқаша айтқанда, киім үлгісі рейске жібермеуге негіз бола алмайды.

Сонымен қатар FlyArystan мен Air Astana әуекомпанияларының жолаушыларды әуе тасымалдау ережелерін зерттедік, бірақ жолаушыларға арналған дресс-код туралы тармақтарды таппадық.

Қандай жағдайда рейстен түсіруі мүмкін?

Бұл ретте тасымалдаушылар жолаушының сыртқы келбеті емес, жағдайы мен мінез-құлқы маңызды екенін баса айтады.

Әуекомпаниялар өкілдерінің айтуынша, егер адам алкогольді немесе басқа да масаң күйде болса, өзін агрессивті ұстаса немесе тасымалдауға тыйым салынған заттары болса, рейске жіберілмеуі мүмкін.

"Тасымалдаудан бас тартуға киім үлгісі емес, жолаушының ұшу қауіпсіздігіне, экипажға немесе басқа жолаушыларға қауіп төндіретін жағдайы немесе мінез-құлқы себеп болуы мүмкін. Атап айтқанда, мәселе алкогольді немесе басқа да мас күйдің белгілері, агрессивті мінез-құлық, сондай-ақ белгіленген ережелерге сәйкес қол жүгі мен багажда тасымалдауға тыйым салынған бұйымдар мен заттардың болуы туралы", - деп хабарлады Scat баспасөз қызметі.

Шетелде ереже қалай жұмыс істейді?

Бізді шетелдік әуекомпаниялар бортында жолаушылар үшін дресс-код ережелері қалай жұмыс істейті қызықтырды. Travel + Leisure мәліметінше, шетелдік көптеген әуекомпания қатаң талап қоймайды, бірақ сыртқы келбеті орынсыз болса, рейске жібермеуге құқылы.

Мәселен, American Airlines "орынды киіну" туралы жалпы ұсыныспен шектеліп, жалаң аяқ немесе қорлайтын принттері бар киіммен келген жолаушылардың ұшаққа мінуіне тыйым салады.

Spirit Airlines ережелері қатаңырақ, тым ашық киім немесе әдепсіз деп танылған сыртқы келбет рейске жібермеуге себеп болуы мүмкін.

Ұшаққа не кимеген жөн?

Әдеп жөніндегі сарапшылар адамды киімі үшін бортқа жібермейтін жағдайлар сирек кездесетінін айтады. Бірақ расында сұрақ тудыруы мүмкін киімдер бар. Әдеп сарапшысы Майка Мейердің сөзінше, киімге қатысты даулар, әдетте нақты бірнеше жағдайға байланысты туындайды.

Арандатушы жазбалары бар киім

Әдепсіз сөздер, қорлайтын ұрандар немесе 18+ санатындағы суреттер - басқа жолаушылар тарапынан шағым түсетін жиі кездесетін себептердің бірі. Егер мұндай киімге шағым түссе, экипаж киім ауыстыруды сұрауы немесе тіпті рейске жібермеуі мүмкін.

Тым ашық киімдер

Жағажай киімдері, ашық мата, тым қысқа шорты немесе шомылу киіміне көбірек ұқсайтын топтар да жанжалға себеп болуы мүмкін. Әсіресе, тасымалдаушы ережелері қатаңырақ болуы мүмкін халықаралық рейстерде осыны ескеру қажет.

Ыңғайсыз немесе қауіпті киім

Ұшу - бұл әрқашан қарбалас, терминал ішінде жүгіру мен адамды терлетіп жіберетін стресс. Сондықтан жалпы жайлылық үшін ашық майканың орнына тым болмаса кәдімгі футболка, ал аяққа шұлықпен киетін жабық аяқ киім таңдаған дұрыс.

Сарапшының айтуынша, егер киімнен өткір жағымсыз иіс шығып тұрса немесе ол қатты лас болса, әуекомпания басқа жолаушылардың мүддесін қорғап, сізден салоннан шығуыңызды сұрауы мүмкін.

Рейске қандай киім таңдаған жөн?

Ресми тыйым болмаса да, мамандар киімді ең алдымен ыңғайлылық тұрғысынан таңдауға кеңес береді.

Тым тар киім, қысып тұратын шалбар мен джинсы ұзақ ұшу кезінде қан айналымын нашарлатуы мүмкін. Дәрігерлер бірнеше сағаттық ұшу кезінде бұл ісіну және кейбір жағдайда тромбоз қаупін арттыратынын ескертеді.

Авиациялық қауіпсіздік сарапшылары төтенше жағдай мен түтін шыққан кезде синтетикалық маталар лезде еріп, теріге жабысып қалатынын еске салады. Сондықтан табиғи мақтадан жасалған киім әлдеқайда қауіпсіз.

Бұған дейін саяхатшылар мен стилистер ұшу кезінде ыңғайсыз аяқ киімнен, джинсы мен шамадан тыс макияждан бас тартуға кеңес берген болатын.

Ең қолайлы нұсқа - табиғи матадан тігілген ыңғайлы әрі кең киім, шұлық және жабық аяқ киім.

Следите за нашими новостями в Google News

Подписаться