Сайлауалды үгіт материалдарын орналастыру құны туралы мәлімет 18 шілдеге дейін жариялануы керек

Қазақстан Республикасы Орталық сайлау комиссиясы бұқаралық ақпарат құралдары мен онлайн-платформаларды пайдаланушыларға сайлауалды үгіт материалдарын орналастыру ақысының мөлшері мен шарттары туралы мәліметтерді заңда белгіленген мерзімде жариялау қажеттігін еске салды, – деп хабарлайды Aikyn.kz сайты.

«Қазақстан Республикасындағы сайлау туралы» Қазақстан Республикасының Конституциялық заңы 28-бабының 3-тармағына сәйкес бұқаралық ақпарат құралдары мен онлайн-платформаларды пайдаланушылар сайлау алдындағы үгіт жүргізу басталғанға дейін кемінде бес күн бұрын, яғни 2026 жылғы 18 шілдеден кешіктірмей, шарттық негізде ұсынылатын сайлау алдындағы үгіт материалдарын орналастыру ақысының мөлшері мен шарттары туралы мәліметтерді жариялап, сондай-ақ оларды Қазақстан Республикасы Орталық сайлау комиссиясына ұсынуға тиіс.

Шарт негізінде эфир уақытын, баспа бетін және ақпарат көлемін беретін бұқаралық ақпарат құралдары мен онлайн-платформаларды пайдаланушылар сайлау алдындағы үгіт материалдарын орналастыру ақысының мөлшері мен шарттары туралы мәліметтер жарияланғанға дейін партиялық тізімдерін ұсынған саяси партиялардың сайлау алдындағы үгіт материалдарын орналастыруға және таратуға құқылы емес.

Сайлау алдындағы үгіт материалдарын орналастыру ақысының мөлшері мен шарттары туралы мәліметтерді келесі электронды  пошта мекенжайларына жолдауға болады, – делінген ОСК хабарламасында.