Сәрсемалиевті айыптау актісінен: төрт адамды өлтіру, жасырын жерлеу және Балиға қашу

Тергеу Атырау облысын дүр сілкіндірген қылмыстық істің барлық қырын ашуға бірнеше айын жұмсады. 

Осы уақыт ішінде тергеушілер оқиғалардың толық тізбегін қалпына келтірді: төрт туыстың өлтірілуі, үйдің ауласында және сарайда жасырын жерлеулер, марқұмның атына рәсімделген несиелер және шетелге қашу әрекеті.

Бүгінде сотта жарияланып жатқан деректер ауыр қылмыстық триллердің сценарийін еске түсіреді. 

Тергеу органдары Сұлтан Сәрсемалиевке бірден бірнеше ауыр бап бойынша айып тақты. Оған қайталанған кісі өлтіру, ірі көлемдегі алаяқтық және құжаттарды заңсыз иемдену айыптары жүктелді. Тергеу нұсқасына сәйкес, бірнеше ай бойы ол бұрынғы жұбайының туыстарын бірінен соң бірін өлтіріп отырған. 

Алғашқы құрбан 

Оқиға 2025 жылдың мамыр айында басталды. Сол кезде Сәрсемалиев пен жұбайы Ақбаян Мұқанғалиева арасындағы қарым-қатынас шиеленісіп, отбасы ауыр дағдарысты бастан кешіп жатқан еді. Туыстар жанжалға араласып, балалар уақытша жақындарының қолында болды.

14 мамыр күні Атырауға жұбайының ағасы — Наурыз Мұқанғалиев келген. Айыптау актісінде көрсетілгендей, ол Сәрсемалиевпен Мұнайшы ықшамауданындағы жалға алынған үйде кездескен. Сол жерде екеуінің арасында жанжал шығып, ол төбелеске ұласқан.

Тергеу нұсқасына сәйкес, жанжал кезінде Сәрсемалиев ас үйдегі пышақты алып, қайынағасының кеуде мен іш тұсына бірнеше рет салған. Алған жарақаттарынан Мұқанғалиев оқиға орнында көз жұмған.

Түнде Сәрсемалиев марқұмның денесін кілемге орап, үйдің ауласында көміп тастаған. Кейін ол қан іздерін мұқият жуып, кілем мен пышақты өртеп жіберген деп көрсетілген айыптау актісінде.

Бірақ бұл оқиға мұнымен аяқталған жоқ. Айыптау деректеріне сәйкес, Сәрсемалиев марқұмның телефоны мен құжаттарын алып, оны іс жүзінде «өлі жанға» айналдырған. Kaspi.kz арқылы өлген адамның атына 4 миллион теңгеден астам сомаға тауарлық кредиттер рәсімдеген. Сонымен қатар, картаға мүгедектік бойынша мемлекеттік жәрдемақылар түсе берген, ал тергеу нұсқасына сәйкес, оларды да айыпталушы пайдаланған.

Наурыздың туыстарына оның жоғалуын: «ол кетіп қалды, байланысқа шыққысы келмейді» деп түсіндірген.

Сарайдағы қылмыс

2025 жылдың күзіне қарай Наурызды іздеу әрекеттері күшейе түсті. Туыстары оның жоғалғанына алаңдап, жауап талап ете бастады. Тергеу болжамынша, дәл осы кезде Сәрсемалиев басқа отбасы мүшелерінен де құтылуды ойлаған.

3 қараша 2025 жылы ол Қызылқоға ауданының Жангелдин ауылына, жұбайының ата-анасына барған. Жанжалдың себебі тағы да балалар мен бұрыннан келе жатқан отбасылық реніштер болды.

Іс материалдарына сәйкес, Сәрсемалиев алдын ала пышақ алып барған. Жанжал кезінде ол сарайда алдымен енесін, кейін қайын атасын өлтірген.

Қылмыстан соң айыпталушы сарайдың ішінде шұңқыр қазып, ерлі-зайыптылардың денесін көміп тастаған. Үстіне жиһаз бен тұрмыстық заттарды жинап қойып, жерленген орынды жасыруға тырысқан.

Кейін Сәрсемалиев марқұмдардың телефондарынан туыстарына хабарламалар жіберіп отырған. Онда қарт жұптың Атырауға емделуге шұғыл кеткені және оларды мазаламауды өтінгені жазылған.

Соңғы құрбан

Тергеу нұсқасына сәйкес, келесі құрбан — жұбайының әпкесі Мейрамгүл Қарабалина болған.

Айыптау актісінде көрсетілгендей, ол Сәрсемалиевтің Мұнайшы ықшамауданындағы үйінде тұрғанда тұрмыстық жағдайдың ауырлығына және азық-түліктің жоқтығына шағымданған. Мейрамгүл мұндай үйде қала алмайтынын, кеткісі келетінін айтқан.

Тергеу болжамынша, осы сөздер Сәрсемалиевтің ашуын туғызған. Ол ас үйдегі пышақты алып, Мейрамгүлге бірнеше рет жарақат салған. Алған жарақаттарынан ол оқиға орнында көз жұмған.

Іс материалдарына сәйкес, осыдан кейін Сәрсемалиев Мейрамгүлдің денесін кілемге орап, дәлізге шығарып қойған. Кейін ол аулада қазылған шұңқырға көміп тастаған — дәл сол жерге бұған дейін Наурыз Мұқанғалиев жерленген еді.

Өзбекстан арқылы қашу 

Қылмыстардан кейін Сәрсемалиев жұбайымен бірге Қазақстаннан кетіп қалған. 

Тергеу деректеріне сәйкес, Сәрсемалиев пен жұбайы алдымен Шымкент арқылы Өзбекстанға шыққан. Кейін олар Ташкентке жетіп, одан әрі Индонезияға ұшып кеткен.

Бірнеше ай бойы ерлі-зайыптылар Бали мен Ломбок аралдарында тұрған.

Тергеу деректеріне сәйкес, айыпталушының ұсталуына оның өзі қалдырған цифрлық із себеп болған. 2026 жылдың ақпанында әлеуметтік желілерде қамқоршысыз қалған балалардың тағдыры туралы ақпарат тарағаннан кейін, Сәрсемалиев интернетке кіріп, жарияланымдарды қараған.

Дәл осы әрекет оның орналасқан жерін анықтауға мүмкіндік берген. Тергеу болжамынша, цифрлық із құқық қорғау органдарын Ломбок аралындағы қонақүйлердің біріне алып келген.

26 ақпан 2026 жылы Сұлтан Сәрсемалиев Қазақстан мен Индонезия құқық қорғау органдарының бірлескен операциясы барысында ұсталды. Кейін ол Қазақстанға экстрадицияланды.

Тергеу қорытындылары

Айыптау актісінің материалдарына сәйкес, Сәрсемалиев өз кінәсін мойындап, тергеу әрекеттері барысында қылмыстардың мән-жайын егжей-тегжейлі сипаттап берген.

Кешенді сот-психиатриялық сараптама оның ақыл-есі дұрыс екенін анықтады. Сарапшылар қылмыс жасаған сәтте ол өз әрекеттерінің сипатын толық түсінген деген қорытындыға келген.

Молекулалық-генетикалық және биологиялық сараптамалар төрт марқұмның да жеке басын растады. Олардың сүйектері жасырылған жерлерден табылған.

Қылмыстық іс сотқа жолданды. Сұлтан Сәрсемалиевке өмір бойына бас бостандығынан айыру жазасы тағайындалуы мүмкін.

АЖ анықтамасы

Сұлтан Сәрсемалиевке ҚР Қылмыстық кодексінің келесі баптары бойынша айып тағылды:

— 99-бап, 1-бөлік — кісі өлтіру; 

— 99-бап, 2-бөлік, 1), 13) тармақтар — екі немесе одан да көп адамды қайталап өлтіру; 

— 99-бап, 2-бөлік, 5), 13) тармақтар — басқа қылмысты жасыру мақсатымен кісі өлтіру; 

— 188-бап, 1 және 3-бөліктер — ұрлық; 

— 190-бап, 3-бөлік — ірі көлемдегі алаяқтық; 

— 384-бап, 2-бөлік — жеке құжаттарды заңсыз иемдену.

Айнұр САПАРОВА 

Автор түсірген сурет

Бүгін, 19:19