Сегіз жылға сотталды : Гүлнар Бажкеноваға қатысты үкім шықты

Алматының Бостандық аудандық соты бүгін, 18 тамызда журналист Гүлнар Бажкеноваға қатысты қылмыстық іс бойынша үкім шығарды, – деп хабарлайды Aikyn.kz сайты.

Сот Бажкенованы заңсыз кәсіпкерлікпен айналысу, сеніп тапсырылған мүлікті ысырап ету және жалған ақпарат тарату баптары бойынша кінәлі деп таныды.

Бұған дейін прокурор Қуаныш Қанапиянов айыптардың жиынтығы бойынша Гүлнар Бажкенованы сегіз жылға бас бостандығынан айыруды, жазаны өтеуді екі жылға кейінге қалдыруды және бес жыл мерзімге журналистік, жария және басшылық қызметпен айналысу құқығынан айыруды сұраған.

Судья Елена Кван Бажкенованы сегіз жылға бас бостандығынан айыру туралы үкім шығарды. Бірақ жазаны өтеу екі жылға кейінге қалдырылды.

Сот үкіміне сәйкес, ол орташа қауіпсіздік мекемесінде жазасын өтеуі тиіс. Сонымен қатар Бажкенова бес жыл мерзімге журналистік және жария қызметпен айналысу құқығынан айырылды.

Жазаны өтеу мерзіміне 2026 жылғы 1 ақпаннан бастап қамауда болған күндері есептелді. Гүлнар Бажкенова сот барысында тағылған айыптардың ешқайсысын мойындамаған.