Семейде 4 млрд теңгеден астам шығын келтірген алтын кенін ұрлау ісі бойынша үкім шықты

Абай облысында алтын кені ұрлығына қатысты ірі қылмыстық іс бойынша сот үкімі жарияланды. Семей қаласының үш тұрғыны қаржы-инвестициялық корпорацияның өндірістік нысанынан алтын құрамды кенді заңсыз иемденгені үшін кінәлі деп танылды.

Сотта белгілі болғандай, айыпталушылар «Алел» қаржы-инвестициялық корпорациясына тиесілі өндірістік объектілерге заңсыз кіріп, құрамында алтыны бар кенді жүйелі түрде ұрлаған. Келтірілген материалдық шығын көлемі 4 млрд теңгеден асады.

Тергеу деректеріне сәйкес, «алтын бөлме» деп аталатын аймақтан ұрлық жасау әрекеттері 2019 жылдан бастап тұрақты түрде жүзеге асырылған. Сонымен қатар, сотта айыпталушылар мен олардың жақын туыстары қылмыстық жолмен алынған табысты заңдастыру мақсатында қонақүй кешендері, коммерциялық нысандар, сауда үйлері, дәріханалар, пәтерлер мен автокөліктер сияқты жылжымалы және жылжымайтын мүліктерді сатып алғаны анықталды.

Семей қаласының қылмыстық істер жөніндегі ауданаралық сотының үкімімен сотталғандар 10 жылға, 6 жыл 8 айға және 5 жыл 6 айға бас бостандығынан айырылды. Үкім әзірге заңды күшіне енген жоқ.

Бүгін, 17:02