Семейде инновациялық байқау өтті

Семейде «Айсана» инновациялық бағдарламасы аясында аграрлық саланы дамытуға бағытталған ірі конкурс өтті. Сайысқа Қазақстанның әр аймағынан келген 50 студент пен жас зерттеуші қатысып, ауыл шаруашылығының тиімділігін арттыруға арналған жаңа идеяларын ұсынды.

Астана, Алматы, Өскемен және Шымкенттен жиналған жастар 48 сағат бойы үздіксіз жұмыс істеп, егін және мал шаруашылығында қауіпсіздікті күшейту, өндіріс үдерістерін оңтайландыруға бағытталған жобалар әзірледі. Ұйымдастырушылардың айтуынша, байқаудың басты мақсаты – аграрлық секторға заманауи технологиялар мен тың шешімдерді енгізуге ниетті жас мамандарды қолдау. Байқау қорытындысы бойынша үздік деп танылған жобаларға бағалы сыйлықтар табысталды. Сонымен қатар таңдалған бастамаларға отандық компаниялар тарапынан инвестиция бөлініп, олардың әрі қарай дамуына жан-жақты қолдау көрсетілмек.

Ақбота Мұсабек, қатысушы

- Бұл жоба фермерлердің күнделікті өмірін жеңілдету үшін арналған. Мысалы, қазіргі таңда фермерлер бүкіл нәрсені мал басқаруды, деректерді өздері енгізеді. Олардың барлығы қолдан жазылғандықтан қателік болып тұрады. Сондықтан біз бүкіл осы процесті цифрландырып отырмыз.