Сенатор: жол ережесін жүйелі түрде бұзатындарды қатаң жауапқа тарту керек

- Осыған қатысты талай ұсыныс болды. Былтыр өзімнің депутаттық сауалымда жол ережесін жүйелі түрде бұзатындарды қатаң жауапқа тарту керек екенін жарияладым. Бұл тұрғыда жол ережесін жиі бұзатындарға айыппұл төлеуде 50% жеңілдікті алып тастау керек. Сонымен қатар, көп ереже бұзу дерегі бар жүргізушілерді жол жүрісі қағидалары бойынша емтиханды қайта тапсыруға жіберуді міндетті ету ұсынысын да айттым. Сондықтан осы мәселелерді Үкіметпен бірге пысықтап, алдағы уақытта қаралатын заң жобаларына аталған ұсыныстарды енгізу жоспарланып отыр. Статистикаға сүйенсек, жүргізушілердің 94 пайыздан астамы жол ережесін қатаң орындап жүр. Шамамен жүргізушілердің 5-6 пайызы ережені жүйелі түрде бұзып тұрады. Дәл осыларға қатысты жауапкершілікті қатаңдату керек, - деді М. Қожаев Сенаттың жалпы отырысынан кейін тілшілер сұрағына жауап бере отырып.

Мұнымен қоса ол үш адамның өмірін қиған Алматыдағы ірі жол-көлік оқиғасына қатысты пікір айтты.

- Қазір бұл апатқа қатысты әлеуметтік желіде түрлі ақпарат тарап жатыр. Полиция соның бәрін тексереді. Бұл деректер дәлелденіп жатса, кінәлілер жауапқа тартылады, - деді сенатор.

Бұдан бұрын хабарланғандай, жақында Алматыда жол апатынан үш адам қаза тапты.

Еске салсақ, бұған дейін Сенат депутаты Марат Қожаев жол ережесін жиі бұзатындар айыппұлды жоғары сомада төлеуі керек екенін айтты.