Сергей Пономарев: Табиғатты қорғау жаңа Конституцияның басты міндеті

Еліміздің жаңа Конституция жобасында экология мәселесі мемлекеттік саясаттың ең жоғары деңгейіне көтерілді, – деп хабарлайды Aikyn.kz сайты.   

«AMANAT» партиясы фракциясының мүшесі, Мәжіліс депутаты Сергей Пономарев жаңа жобадағы өзгерістер табиғатты қорғауды заңдық міндетке айналдыратынын жеткізді.

Жоба бойынша азаматтардың табиғатты сақтау және оның ресурстарына ұқыпты қарау міндеті Конституцияның 37-бабында нақты көрсетілген. Сонымен қатар  экологиялық қауіп төндірген өндіріс орындары мен деректерді жасырған шенеуніктер заң алдында жауапқа тартылады.

– Жаңа Конституция – экологиялық ар-ұятымыздың конституциясы. Бұл жай ғана сөз емес. Мұндай табиғатты қорғау – басты міндет. Біз Қазақстанның патриоты бола тұра, экологияның ластануына қалай бейжай қарай аламыз? Біз ондаған, тіпті жүздеген жыл бойы табиғаттан тек алып келдік. Оны қаздық, бұрғыладық, пайдаландық. Ендігі кезек – оны сақтау. Балаларымыз таза елде өмір сүруі үшін табиғат байлығын мейлінше үнемді әрі ұқыпты пайдалануымыз керек, – деді депутат С.Пономарев.

Депутат жаңа нормалар күшіне енген соң, экологиялық талаптарды бекітетін заңдар пакеті әзірленетінін айтты. Сонымен қатар ол Алматы қаласындағы экологиялық жағдайға тоқталып, ауаны тазарту бағытындағы шараларды атап өтті.

– ТЭЦ-2 стансасын газға көшіріп, зиянды қалдықтарды азайтпақ ойымыз бар. Сонымен қатар  қала аумағында дизель мен көмірді пайдалануға шектеу қойылып, ескі көліктердің қозғалысына бақылау күшейтілмек, – деді Сергей Пономарев.