Серпін берер серіктестік

Ерлан Қошанов Рамиль Гасанды ТүркПА Бас хатшысы қызметіне кірісуімен құттықтап, оның кәсіби біліктілігі мен түркі елдері ұйымдарындағы мол тәжірибесін атап өтті.

Мәжіліс спикері түркі мемлекеттерінің ынтымақтастығы Қазақстан үшін басым бағыт екенін айтып, түркі бірлігін нығайтуға парламентшілердің зор үлес қосып келе жатқанына назар аударды. Сондай-ақ жуырда Габала қаласында өткен Түркі мемлекеттері ұйымы саммитінің маңыздылығына тоқталды. 

– Бұл саммит біздің елдеріміздің арасында өзара саяси ықпалдастық жоғары деңгейде екенін көрсетті. Мемлекет басшылары өңірлік бейбітшілік пен қауіпсіздік мәселелерін жан-жақты талқылады. Габала саммитінің нә­тижелері ТүркПА жұмысына, соның ішінде заң шығару ісіне және бірлескен жобаларды жүзеге асыруға тың серпін беретініне сенімдімін, – деді Мәжіліс спикері.

Ұйымның қазіргі төрағасы ретінде Ерлан Қошанов ТүркПА ішінде өзара ынтымақтас­тықты нығайтуға бағытталған бірнеше маңызды міндетті атап өтті. Олардың қатарында ұйымның басты құқықтық құжаттарын жетілдіру, Астанада парламенттердің салалық комитеттерінің отырыстарын өткізу және Әзербайжанда Түркология съезінің 100 жыл­дығына арналған іс-шараларды ұйымдастыру сөз болды. 

Кездесуде жаңа ынтымақтастық формат­тарын енгізу арқылы ТүркПА құрамын кеңейту мүмкіндіктері, Ассамблея қызметін Түркі мемлекеттері ұйымы қызметімен және басқа да түркі институттарымен үйлестіру мәселелері талқыланды.

ТүркПА Бас хатшысы Мәжіліс төрағасына ұйым құрамындағы парламент төрағаларының бейресми кездесулерін жандандыру, әйел депутаттар мен жастар бағытындағы жұмысты кеңейту туралы ұсыныстарын айтты. Сондай-ақ ТүркПА елдерінің мүдделерін басқа да парламентаралық алаңдарда өзара қолдаудың маңыздылығы жөнінде идеялар ортаға са­лынды.