Шағын және орта бизнес Астана экономикасының үштен екісін қамтиды

Астанада шағын және орта бизнес қаланың негізгі экономикалық қозғаушы күшіне айналды.
Қазіргі таңда елордада 246 мың шағын және орта кәсіпкерлік субъектісі жұмыс істейді. Бұл секторда 560 мыңға жуық адам еңбекпен қамтылған.

Үкіметтің мәліметінше, шағын және орта бизнестің Астана экономикасына қосқан үлесі 66 пайызға жеткен. Сондай-ақ секторда қаланың экономикалық белсенді тұрғындарының шамамен 76 пайызы жұмыс істейді.

Астана қаласы әкімдігінің Инвестициялар және кәсіпкерлікті дамыту басқармасының басшысы Халел Әкімжанов соңғы жылдары логистика, өнеркәсіп және құрылыс салалары жоғары өсім көрсетіп отырғанын айтты. Оның сөзінше, тартылған инвестициялардың 38,8 пайызы логистика мен қойма инфрақұрылымын дамытуға бағытталған. Ал өнеркәсіп өндірісінің өсімі 7,6 пайызды құрады.

Биыл елордада жалпы құны 68,4 млрд теңге болатын 26 өнеркәсіптік жобаны іске асыру жоспарланған. Нәтижесінде 1,4 мыңнан астам жаңа жұмыс орны ашылады.

Қазірдің өзінде құны 32,1 млрд теңге болатын сегіз жоба пайдалануға беріліп, 500 адам жұмыспен қамтылды. Жыл соңына дейін тағы 18 өндірістік жобаны іске қосу көзделіп отыр. Бұл жобаларға 36,3 млрд теңге инвестиция салынып, қосымша 956 жұмыс орны құрылады деп күтілуде.

Мамандардың пікірінше, кәсіпкерлік белсенділіктің артуы мен жаңа өндірістердің ашылуы Астананың экономикалық өсімін жеделдетіп, қаланың инвестициялық тартымдылығын күшейте түседі.