Шапалақ шоу: Power Slap спортында тағы бір қазақстандық бақ сынайды

Power Slap 16 турнирінде қазақстандық Данияр Шахаров дебютін өткізеді, - деп хабарлайды Aikyn.kz

"Спорт Шредингера" телеграм арнасының мәліметінше, жекпе-жек 24 қазанда Абу-Дабиде, UFC 321 турнирінің қарсаңында өтеді.

Бұған дейін бұл спорт түрінде ел намысын Закир Найманбаев қорғаған еді. Ол енді келесі кездесуін ауыр салмақтағы бірінші нөмірлі спортшы, америкалық Дориан Перезге қарсы өткізеді.

Бұл жекпе-жек 31 қазанда Сауд Арабиясында өтетін Power Slap турнирінің бірлескен басты оқиғасы болмақ.

Power Slap — бұл қарсыластардың бір-біріне шапалақпен соққы беруіне негізделген жаңа спорт түрі. Әр спортшы кезекпен ұрып, қарсыласын нокаутқа түсіруге немесе төрешілер шешімімен жеңіске жетуге тырысады.

Бұл формат алғаш рет 2023 жылы таныстырылып, қысқа уақыт ішінде жаһандық көрермендердің назарын аударды.

Power Slap жобасының иесі әрі бастамашысы — UFC президенті Дана Уайт. Ол бұл лиганы ресми түрде UFC-дің медиа және ұйымдастыру мүмкіндіктерін пайдалана отырып дамытып келеді.