Шетелдік әншілердің концертіне қатысты талаптар өзгереді

АСТАНА, 6 ақпан – Sputnik. Мәдениет және ақпарат вице-министрі Евгений Кочетов шетелдік әншілердің концертін өткізуге қатысты талаптардың қалай өзгеретінін айтты, деп хабарлайды Sputnik Қазақстан тілшісі.

Қазіргі кезде шетелдік әншілер Қазақстанда концерт өткіземіз десе, алдымен жарнамасын жариялайды. Сосын билеттердің қалай сатылып жатқанын бақылап отырады.

"Билеттер жақсы сатылса ғана келісімшарт рәсімделіп, жергілікті жерде әкімдікпен жұмыс басталатын. Ашығын айту керек, ондайда министрлік те, әкімдік те кей кезде шетелдік әншінің гастрольдік турмен келе жатқанын білмей отырады. Біз оны әлеуметтік желіден ғана көріп отыратынбыз", - деді Кочетов сенаттағы брифингте.

Ал жаңа заң бойынша шетелдік әнші белгілі бір қалаға барып, концерт беремін десе, бірден әкімдікпен келісімшарт жасауға міндетті.

"Келісімшартта әншінің міндеттері де көрсетіледі. Соның ішінде концерттен айтылатын әндердің мазмұнына қатысты нақты талаптар бар. Атап айтқанда, порнография, есірткі және тағы басқа мемлекет мүддесіне қайшы контент болмауы қажет. Бәрі дұрыс болса, концертке рұқсат беріледі", - деді вице-министр.