Шетелдік инвестициялар көлемін $22,5 млрд жеткізу көзделді

Былтыр негізгі капиталға 22,7 триллион теңгеге инвестиция құйылды.

Биыл межені арттырып, шетелден келетін инвестицияны 22,5 миллиард долларға жеткізу көзделіп отыр. Бұл туралы Премьер-министрдің шетелдік инвестицияларды тарту бойынша өткізген кеңес отырысында айтылды. Олжас Бектенов Президенттің осы бағытқа қатысты алға қойған міндеттерін атады. Бұдан бөлек, жиында инвесторлардың құқықтарын қорғау және жобаларды сүйемелдеу тетігін нығайту шаралары да қаралды. Бүгінде прокурорлар мемлекеттік органдардың 27 мың шешімін зерделеп, мыңнан астам негізсіз бастамаларды тоқтатқан. Инвесторлардың қатысуымен болған сот даулары 30 пайызға қысқарған. Сондай-ақ 2 мыңға жуық инвестордың мәселесі нақты шешілген. Бұған қоса Үкімет басшысы мақұлданған жобаларды жүзеге асыруға кедергі келтіргені үшін «Kazakh Invest» ұлттық компаниясы мен әкімдіктер қызметін сынға алып, ескерту жасады. Қазір ұсынылған 25 жобаның үшеуі ғана іске асып жатыр. Олжас Бектенов жауаптыларға үш күн ішінде қалған инвестициялық жобалар бойынша қажетті шешім қабылдауды тапсырды.